Â鶹ԼÅÄ

Yn ystod y blynyddoedd diwethaf hyn, datblygodd Catrin i fod yn artist blaenllaw ym myd cerddoriaeth. Teithiodd ar draws y byd, gan ryfeddu miloedd o bobl gyda'i dawn ryfeddol ar y delyn. Ar ei chyfaddefiad ei hunan, nid perfformio yw ei hunig fwriad. "Rwyf eisiau rhoi delwedd fodern, newydd i'r delyn," meddai, "a chwalu'r darlun ohoni fel offeryn hen ffasiwn."

Bydd yn dod â grŵp offerynnol o ffrindiau gyda hi i'w chefnogi, a bydd y côr adnabyddus Cytgan - sy'n nodedig am berfformio heb arweinydd - hefyd yn rhannu'r llwyfan gyda hi. Ffurfiwyd y côr nodedig hwn gan gyn-aelodau Côr Ieuenctid Cymru.

Bydd Gŵyl Llandudoch yn digwydd eleni rhwng Mai 7 a Mai 21, ac mae'r rhaglen yn fwy uchelgeisiol nag o'r blaen. Yn ogystal â Catrin Finch, bydd Côr Ysgol Gerdd Ceredigion hefyd yn cynnal cyngerdd yn yr abaty yn ystod yr ŵyl, ar Ddydd Sadwrn, Mai 13. Mae Islwyn Evans, Cyfarwyddwr Cerdd y côr, yn hoff iawn o'r abaty fel safle i gyngerdd. Dyma gôr sydd wedi hen ennill ei blwyf yng Nghymru a thu hwnt, ac un sy'n llwyddo i wefreiddio cynulleidfa dro ar ôl tro. Yn ogystal â'r ddau gyngerdd awyr agored, bydd digwyddiadau eraill hefyd.

Ar nos Fercher, Mai 10 bydd cyfle arall i weld y ddrama 'Linda, Gwraig Waldo' o waith Euros Lewis a enillodd cymaint o ganmoliaeth pan fu ar daith yng Ngheredigion a Phenfro rai wythnosau nôl. Nos Wener, Mai 12 noson o ganu anffurfiol yng nghwmni Côr Meibion Blaenporth ar y Netpwl, gerllaw'r Teifi Inn. Dylai hon fod yn noson hwyliog a cherddorol yng nghwmni un o'n corau lleol. Digwyddiad newydd i'r Ŵyl eleni yw Gig yr Ŵyl. Nos Sadwrn, Mai 13 bydd pedwar o grwpiau modern â chysylltiadau â'r ardal yma yn perfformio mewn noson gyda'i gilydd Mattoidz, Ha Kome, Garej Dolwen a Pala. Arbrawf newydd i geisio rhoi'r ieuenctid yng nghanol y gweithgareddau.

Caiff cystadlaethau llenyddol Eisteddfod Llandudoch eu beirniadu gan Mererid Hopwood mewn noson o Lenydda - cystadleuaeth Talwrn y Beirdd, fydd yn digwydd ar Nos Fercher, Mai 17. Bydd pedwar o dîmau Talwrn yn ymgiprys eleni dan law ofalus ein meuryn, y Prifardd Dic Jones.

Bydd yr eisteddfod ei hun yn digwydd ar Ddydd Sadwrn Mai 20. Mae cystadleuaeth Côr Llandudoch yn parhau eleni eto, gan gynnig £1000 i'r enillydd. Cynigir gwobrau da hefyd yng nghystadlaethau unigol yr eisteddfod. Dylai hon fod yn noson o gystadlu o safon uchel iawn gan berfformwyr profiadol.

"Dyma'r ŵyl mwyaf uchelgeisiol hyd yma," meddai John Davies, cadeirydd Cymdeithas Llandudoch, "ac rydym yn edrych ymlaen at groesawu'r torfeydd i Landudoch i fwynhau'r adloniant o'r radd flaenaf sydd wedi ei drefnu ar eu cyfer. Nid yn aml y cawn ni'r cyfle i groesawu artistiaid o safon Catrin Finch i'r rhan yma o'r wlad."

Rhifau cyswllt:
Terwyn Tomos : 01239 612928 (07815 552672)
John Davies: 01239 614543
Rosemary Davies: 01239 612030