Beirdd Myrddin v Crannog
Rownd 1 Beirdd Myrddin v Crannog
Trydargerdd Neges yn mynegi siom.
Ni chefais alwad ganddi,
Na llith mewn amlen wen,
Dim ond rhyw ddau emoji
I ddweud ein bod ar ben.
Bryan Stephens - 8.5 pwynt
Y to hÅ·n trwy Brexit aeth
Adref i’w Hymerodraeth.
Endaf Griffiths - 8.5 pwynt
Cwmpled Caeth yn cynnwys y gair 'pert'.
Er mor bert yw'r môr o'r bae,
dienaid yw ei donnau.
Aled Evans - 9 pwynt
Go brin fod lili’r llinach
Yn rhy bert i’r border bach.
Elsie Reynolds- 8.5 pwynt.
Limrig yn cynnwys y llinell 'Fe holais yr adran gynllunio'.
Fe holais yr Adran Gynllunio
Am fur rhwng Gwbert a Charno,
Cyn uched â thŵr,
A'i gylchynu gan ddŵr,
A'r Gogs i dalu amdano.
Ann Lewis - 8 pwynt
Ar ôl i mi godi’r sied gneifio,
a’r parlwr i gant o dda godro,
y garej i’r ceir,
a chwt bach i’r ieir
fe holais yr adran gynllunio.
Endaf Griffiths - 9 pwynt
Cerdd ar fesur yr englyn milwr - Unben.
Wyf geidwad pob diadell,
wyf fintai dan un fantell
yn ffromi: wyf gi o'i gell.
Rhof bader dros ddoleri,
A llais tros eu lluosi
Yna'u dwyn i 'mhoced i.
Wyf wên iach ac yn drachwant,
Yn chwys oer am swache sant,
Yn ffiaidd o ddiffuant.
Rhof garreg ar bob egin
A boddaf lais pob byddin.
Un ffordd fynnaf i: cau'r ffin.
Lowri Lloyd - 9 pwynt
Ceir unben ym mhob pennaeth,
Yn y mêr mae’n blentyn maeth,
Un o wyrion Hitleriaeth.
Ef yw ceg y rhethregu,
Y saethwr sy’n torsythu
Dros hoywon a dynion du.
Fe’i ganed i weithredoedd;
Cofied, fileinied ei floedd,
Yn ei gryman mae’r grymoedd.
Tra bo byddin yn ffiniau,
Ar ei farch mae’n eu cryfhau,
A’i lathen â’n daleithiau.
Yn ei balas, atgas yw,
Un na fedd un hawl i fyw.
Fe’i wadaf, - ond fi ydyw.
Idris Reynolds - 9 pwynt
Pennill Ymson mewn dosbarth ffitrwydd.
Rwyf yma'n pwmpio'r awen
Am fod fy odlau'n llac,
Gan sefyll yn reit betrus
Rhwng Alan a Mei Mac.
Daw Ceri Wyn fel Rocky
I wthio'r pês yn gynt
A'm gadael ar fy ngliniau
Yn hollol mas o bwff.
Garmon Dyfri - 8.5 pwynt
Rwyf yma’n ddyddiol yn ymlâdd
Heb wybod pam na sut,
Ond pan gyrhaeddai’r ochor draw
Fe fyddai’n weddol ffit.
Elsie Reynolds - 8 pwynt
Cân Ysgafn - Y Raffl.
Pan drengodd Pwtyn druan
Y cwrcyn melyn cu
Fe raffles ei weddillion
Fel parch i’r hwn a fu.
Fe werthais y tocynnau
I ffrindiau, un neu ddou,
Gan rannu’r gwobrau wedyn
Sef darnau o’r hen foi.
‘Nillodd Boris y bechingalws
(Ma’ rhai fe ‘di wero mas)
Cafodd Gove a’r ffyddlon Nigel
Bobi ddarn o’r gynffon fras.
Y second preis oedd perfedd
Ca’th Theresa hwnnw i gyd
A gweithodd gawl ohono
Er lles unbeniaid byd.
Fe gadwes y wobr gyntaf
Rwy’n ei wisgo am fy mhen
Sef blewiach yr hen bwsi
Mae’n siwto i’r dim. Amen.
Bryan Stephens - 8.5 pwynt
Mae Radio Cymru, er mwyn gwneud arian,
Yn cynnal raffl o’i rhaglenni ei hunan.
A phenderfynwyd, ar ôl gwerthu’r tocynne,
Dynnu’r enwe o’r het yn Oedfa’r Bore.
Os byddwch yn lwcus cewch gyfle i fynd off-i
Gael paned o de ar raglen Siân Coffi,
Neu ddilyn C2 sydd newydd gael grant
I Emyr y Graig ganu Bach ar gerdd dant.
Cofiwch, wrandawyr, mae’r gwobrau yn hael,
O Dan yr Wyneb mae bargeinion i’w cael
Fel stori’r plant bach a guddir rhag plantos
Rhwng dechrau’r Talwrn a diwedd Dei Tomos.
Pan ddaw’r Post Cyntaf, yn ddifyr a dwys,
Yn ei gadair bydd Dylan fel bardd y mwys
Ac yna, fel Waldo, fe fydd mewn dau barc
Yn chwarae â geiriau ac Ar y Marc,
A thra bo ni’n crybwyll y bardd o Sir Benfro
Ceir un funud fach ‘da John Hardy i Gofio.
Dwy bunt y strip er mwyn cael eich tywys
Drwy weledigaethau Betsan Powys.
Idris Reynolds - 8.5 pwynt
Ateb llinell ar y pryd.
Un eiliad oedd, eiliad wan
Ac oes yn cofio'r gusan.
0.5 pwynt
Telyneg mewn mydr ac odl - Tocyn.
Rhyw bori bûm mewn cyfrol fain
O gerddi serch o'r oes o'r blaen;
Wrth eu hymyl ysgrifen flêr,
A llun y lloer mewn clwstwr sêr,
Calon fechan a'i hinc yn drwch,
Dau yn hwylio i ffwrdd mewn cwch,
Ac yno rhwng dwy ddalen frau,
Darn papur wedi'i blygu'n ddau,
Ei eiriau wedi troi yn graith
Ac ôl y glaw yn atgof llaith.
Y lliwiau wedi pylu'n wyn
Gan droi yn un â'r cerddi hyn.
Ond wrth fyseddu'r papur mân
A'i eiriau coll rhwng cân a chân,
Fe drof drachefn i'w disgwyl hi,
I'r un sedd wag wrth f'ymyl i.
Aled Evans - 9 pwynt
Bwriaf fy mara unwaith
i mewn i’r dyfnder maith,
fe’i fwriaf eto’r eilwaith
ac yna’r drydedd waith,
ond ni ddaw hithau’r Forwyn
na’i gyrr o wartheg gwyn
yn ôl o’r dŵr i hudo
y llanc ar fin y llyn.
Dim ond rhyw donnau mân a gwyd
cyn chwalu’n ddim ar wyneb llwyd.
Endaf Griffiths - 9 pwynt
Englyn - Chwiban.
Gwales
Pe medrwn, fe nofiwn i dros y môr
at y ddôr fawr dderi,
a rhoi olew i dewi
ei hen chwib. Ac i'w chau hi.
Aled Evans - 9.5 pwynt
I Nigel Owens
O raid, y rhagfarn a’r rheg – a giliodd
Cans gwelai pob pymtheg
Fod chwiban yn ychwaneg
Ynot ti dros chwarae teg.
Idris Reynolds - 9.5 pwynt
Enillwyr - Beirdd Myrddin.
