麻豆约拍

Trydargerdd (sef cerdd gaeth neu rydd sydd, fel un o negeseuon Twitter, heb fod dros 140 o nodau cyfrifiadurol): Rheolau Clwb

Fe fyddai gwahardd gwthio, gweiddi,

chwarae'n wirion a maldodi

yn amharu ar aelodaeth

ac apêl ein clwb barddoniaeth.

Gwennan Evans - 8 pwynt

Yn ystod ‘match’ fydd dim clatsio, - Calliwch,

Dim cyllyll, dim cicio ,

Yn bendant dim cerdd-dantio,

Na chwalu tap. – cewch alw ‘to!

Dewi Rhisiart - 8 pwynt

Cwpled caeth yn cynnwys y gair ‘pridd’

Trin y waun sy'n troi'n hanes

gan nad yw pridd yn gwneud pres.

Gruffudd Owen - 9.5 pwynt

Y pridd sydd o dan y pren

A nodda bob winwydden.

Dewi Rhisiart - 8.5 pwynt

Limrig yn cynnwys y llinell ‘Rwy’n siwr i mi glywed “Delilah”

Rwy’n siwr i mi glywed Delilah

yn tagu ar frechdan banana,

fe’i helpwn ar hast

pe na bai’n shwt ast;

fe jecia’i fy e-byst yn gynta‘.

Gwennan Evans - 8.5 pwynt

Yn Seilo ar ddiwrnod Cymanfa

disgwyliwn am sain Haleliwia.

Ond ar Sul y Chwe Gwlad

yn lle moliant i’r Tad

rwy’n siwr i mi glywed Delilah.

Martin Huws - 8.5 pwynt

Cerdd ar fesur yr englyn milwr (rhwng 9 a 15 llinell): Pont

Pont (sef yr hen bont dros Afon Taf, Pontypridd)

Hi yw'r hynaf dros afon

y cwm o hyd, ac mae hon

yn serth, bron iawn â syrthio'n

ei henaint; ond mae hynny

bron fel her i'r dyfnder du.

Mae swyn yn ei simsanu

di-ddur, er bod cerddwyr call

yn tyrru dros bont arall

yn ddiwyd o ddiddeall.

Wedi i ymchwydd ei dymchwel,

ei chodi hi, a'i hail-hel,

bwrw i'w hybu o'r rwbel

wnaeth eraill: damio’i thorri.

Ac oes, mae rhai'n ei chroesi

o hyd, er hyned yw hi.

Ll欧r Gwyn Lewis - 9.5 pwynt

..Bid Bont

Â’i goron y mae’n gorwedd

A’i gledr yn wyn am ei gledd

Yn arwr yn ei fawredd.

Heddiw’n gawr, – ond oedd yn gall

I fyddin ddilyn yn ddall

Heb ddewis nac heb ddeall?

Aeth y werin dros Llinon

I ddistryw a bedd estron.

A’i heb ei hail y bu hon?

Dewi Rhisiart - 8.5 pwynt

Pennill ymson mewn siop frechdanau

Pa ham fy mod dal yma -

rwy’n frechdan fach o frie -
ar-ôl ar silff yn unig
heb neb i mwyta i?

Casia Wiliam - 8.5 pwynt

O damo, dyma bicil

neu odw i ‘mewn jam’?

Ai saith archebodd ffowlyn?

Ai deg archebodd ham?

Martin Huws - 8.5 pwynt

Cân ysgafn (heb fod dros 20 o linellau a heb fod yn soned): Colli Swydd

Ffarwél reolwr llinell a'th e-byst tirion teg.

Ffarwél i bôr y swyddfa, nid wyf yn enwi neb.

Anelaf ar fy union am giw'r ganolfan dôl

a'ch beiros lond fy mhoced a'ch teabags lond fy nghôl.

Ffarwél i gyfarfodydd diderfyn a di-fudd.

Ffarwél i arfarniada; mae nghalon fach mor brudd.

Ffarwél i esgus gweithio tra'n siopa ar y we.

Ffarwél i’r holl gyd-weithwyr y poerais yn eu te.

Ffarwél, styffylwr ffyddlon mae hiraeth lond fy mron.

Ffarwél i'r llungopïwr a waldiais gyda ffon.

Ffarwél i'r memos piwis ar bost-its prydferth pinc.

Ffarwél i'r llestri budron adewais yn y sinc.

Ffarwél i'm hoff iwreinal sydd ar y pumed llawr.

Ffarwél i'r mil o e-byst na chânt eu hateb nawr.

Ffarwél i'r ddwyawr ginio, ffarwél i'r ddynes llnau

sy'n delio mariwana o'i throli bob dydd Iau.

Ffarwél i'r parti Dolig a'i ganlyniadau blêr.

Ffarwél i'r nepotistiaeth a'r ddau sy'n cael affêr.

Rhaid canu'n iach i'r cyfan fe'm gyrrwyd ar fy nhaith

am sgwennu tasgau’r Talwrn yn hytrach na gwneud gwaith.

Gruffudd Owen - 9.5 pwynt

Roedd hwyl i’w gael ym mhobman yn fy nghwmni, meddan nhw

A’r asesiad perfformiad blynyddol yn loyw ei glod, ar fy llw.

Roedd gwahoddiadau cyson im grwydro ar hyd y wlad

A chyfarch ieuenctid y bröydd yn lifrai fy mam a ‘nhad.

Mor falch cael bod yn symbol o werthoedd gwlad y gân:

I Gymru, I gyd-ddyn, I Grist, hwynt i gyd yn ddiwahân.

Ond heddiw, clywais neges, “rhaid cydymffurfio â’n ffyrdd,

Rhaid glynu at gôd ymddygiad, chei di ddim bod yn Mistar Urdd”.

“Pam felly?” gofynnais yn betrus, a minnau yn gwybod yn iawn

Bod y ffradach ‘fo Siwperted neithiwr ‘di ‘ngadael yn ddwfn yn y mawn.

Ond yr arth darodd gynta’, ac roedd rhaid im amddiffyn fy hun -

Roedd ganddo bwerau cosmig, wyddwn i ddim ei fod mor ddi-lun.

Drwy hud a lledrith rhywsut fe droes fy ngwyrdd yn las

Ac felly does dim pwrpas dadlau, â’r swyddog yn sbïo mor gas.

Wrth gwrs, fe gaf dystlythyr am ddiflannu heb lawer o ffws -

A gadael fy nghynefin heb air gan ffrind, heb ‘run sws.

Does dim amdani bellach ond ffoi o’r blaned hon

A chwilio am swydd efo Leusa yn fy iwnifform newydd sbon.

Ond, tybed a’i hyn fyddai’r stori tasai’r gwyrdd yn ei le o hyd

A’r coch yn estyn i’m corun, a’r gwyn ‘di diflannu o’m byd?

Mererid Williams - 9 pwynt

Ateb llinell ar y pryd

Pa ddiben yw'r gorffennol

nid yw'n hawdd i neb fynd nôl

Y Diwc - 0.5 pwynt

Telyneg (heb fod dros 18 llinell): Cwm

(ar y cyfryngau cymdeithasol, dechreuwyd arfer y term 'snowflake' am bobl ifanc sydd, yn ôl pob tebyg, yn hawdd eu cythruddo neu heb fod yn ddigon gwydn a di-hid o safbwyntiau eraill.)

Oes, mae gan eira ffyrdd o lynu i'w gilydd,

dy lithro – a d'amddiffyn rhag dy gwymp;

golchi'r ôl traed o'r trac, dy daflu o'th drywydd,

clustogi popeth â distawrwydd.

Ond dim ond yn y bwlch rhwng haul a glaw

y gweli di wead ei amrywiaeth hardd:

ffosydd astrus sastrugi, y peli polystyren,

neu ddycnwch y llwydrew sy'n tyfu i ddannedd gwynt...

Rwyt ti’n fath arall o ddall, heb weld

heibio gorwel yr esgair agosaf, a’r eira

dan dy draed wrthi’n toddi’n ddiogel.

Pe codet ti o'th gwm hyd gefnen uwch

mi sleifiai dros y grib i'th chwipio:

lluwchio fel llwch y môr a llosgi canhwyllau'r llygaid.

Ac fe glywi di, un dydd,

ddwndwr pell o geunentydd ucha'r cwm,

gan ddeall yn rhy hwyr dy fod ar drugaredd

mympwy oer ein cwymp eira.

Llyr Gwyn Lewis - 9 pwynt

Ddoe,

Yng nghwrlid byw dy artaith

A rhwygo perfedd dy ddyfnderoedd di,

Y crachod du a gwyn,

Y llwydo nant.

Er troi di-baid ar olwyn uwch y siafft

Ac atsain croch yr hwter drwy dy fro,

A rhincian hoelion ar galedwch ffordd y mynd a dod

O wawr i wyll

A mwy;

Rhwng llwch a pheswch draw’n y stryd

Â’r crysau gwyn yn herio’r cwmwl du,

Yn llenwi’r lle, roedd cloncian ffraeth.

Ond heddiw,

 llif dy ffrwd yn loyw lân,

Yr haul yn tywallt emrallt rhwng dy gloddiau cam,

Diwaelod dy dawelwch.

Gwilym Williams - 9 pwynt

Englyn: Haearn

Y gwir ydi, fe gredais - fod ynof

fi dân, mod i’n ffwrnais

gre’, ond yn lle codi llais

yn y frwydr, fe rydais.

Gruffudd Owen - 9.5 pwynt

Deunydd Crai Cerflunydd

Heb urddas yn gras, yn graith erydai

yn rhwd o anobaith.

Ar lannau Taf daw afiaith:

fflwcs diflas yn ias, yn iaith.

Martin Huws - 9 pwynt

Enillwyr - Y Ffoaduriaid