gan Lynda Ganatsiou o Thessaloniki
Wn i ddim beth sy'n dod o'r byd - mae fy ngwallt yn saethu i fyny fel pigau'r draenog bob tro rwy'n clywed stori neu weld lluniau yn ymwneud â chamdrin anifeiliaid.
Mae'r diafol ei hun yn rhai pobl, yn fy nhyb i, yn cyflawni'r fath weithredoedd dychrynllyd ar anifeiliaid mud?
Yn anffodus mae gan bobl ddulliau gwahanol o droseddu ac er ein bod yn byw yn yr unfed ganrif ar hugain mae rhai yn ymddwyn yn anfoesol a direswm.
Dyma rai o'r pethau sydd wedi codi fy ngwrychyn i:
Plant wedi clymu tuniau wrth gwt merlen a'i herlid i lawr y stryd. Wedi dychryn allan o'i cho â'r swn tuniau yn curo yn erbyn ei gilydd llithrodd i ffos gyfagos a thorri ei chefn.
Gwenwyno yn beth cyffredin
Yng ngwlad Groeg, un o'r pethau sy'n codi'r arswyd mwyaf ar berchenogion cathod a chwn, ydy gwenwyno.
Yn hytrach na bod yn weithgarwch braf mae mynd am dro yn golygu bod ar wyliadwriaeth gyson am dameidiau amheus o gig.
Yn yr un modd, os nad yw'r gath o gwmpas amser brecwast rydych yn amau'n syth iddi gael gwenwyn er bod gosod abwyd gwenwynig yn drosedd sy'n dwyn cosb dan Gyfraith Roegaidd, Amddiffyniad Anifeiliaid 1197/81.
Ond "Beth yw'r ots" ydy agwedd y rhan fwyaf a chan fod gwenwyn ar gael yn hawdd mae'n bosib i gymdogion a chanddynt rhyw fath o ddrwgdeimlad ddial trwy ladd anifeiliaid dof.
Mae sawl math o wenwyn 'poblogaidd' a chan amlaf byddant yn cael eu cymysgu â bwydydd tuniau neu eu rhoi mewn sosej, neu ddarn o gaws neu gig amrwd.
Hanes i godi'r cryd arnoch!
Mewn tref o'r enw Pyrgos, yn nwyrain y Peloponnese arestiwyd cigydd wedi iddynt ddarganfod ci yn hongian o fachyn yn ei siop.
Daeth yr heddlu o hyd i gi hanner marw mewn sach ond hawliodd y cigydd mai amddiffyn y ci rhag peryglon y stryd oedd o!
Digwyddodd hyn ar adeg pan oedd teuluoedd yn stocio wyn ar gyfer y Pasg ac ofnai rhai mai cig ci a brynwyd ganddynt.
Crogi ci
Y llynedd daeth teithwyr o'r Almaen ar draws gast hela ifanc wedi ei chrogi mewn coedwig olewydd ar fryniau yn ardal Halkidiki.
 Bu yno am sawl diwrnod cyn ei darganfod a'i chladdu gan yr Almaenwyr. Un awgrym oedd iddi gael ei chosbi am redeg i ffwrdd ar ôl ei dychryn gan swn ergyd.
Dydy pethau fel hyn ddim yn gyhoeddusrwydd da i wlad Groeg a chyn claddu'r ast tynnodd yr Almaenwyr luniau a'u hanfon i bapur newydd Almaenig.
Er mor gyffredin ydy camdrin anifeiliaid yma ychydig iawn sy'n cael ei wneud gan yr awdurdodau i rwystro'r euog.
Gwelwn anifeiliaid wedi eu gwenwyno ar y teledu ond hyd yn oed os yw'r mater yn cyrraedd y llys (ac anaml iawn y digwydd hynny) ni chyhoeddir hanes y prawf na'r ddedfryd.
Y canlyniad yw fod pobl yn tybio y gallant barhau a'u gweithgareddau creulon heb ofni cosb.
Dywed rhai fod helwyr yn saethu cwn a ystyriant annefnyddiol neu anufudd a chwynir na wneir ymdrech iawn i hyfforddi a dysgu cwn.
Y canlyniad yw fod cwn hela ledled gwlad Groeg yn cael eu camdrin a'u hesgeuluso a rhai yn cael eu taflu o'r neilltu megis teganau unwaith nad yw eu perchennog eu heisiau.
Gollwng cwn bach
Echdoe pan yn siarad ar y ffon a'm ffrind - o'r Rhyl yn wreiddiol - ym mhentref cyfagos Panorama dywedodd fod rhywun yr union eiliad honno yn gollwng dau gi bach y tu allan i'w thy fel y byddai plant ysgol gyfagos yn eu tolach!
Pa mor greulon ydy rhai pobl. Mae gen i gi o'r enw Rex. Bois bach, mae e'n un hardd. Hanner Alsatian a hanner Husky yde e a chan fy mod yn siarad ag ef yn gyson mae'n deall popeth.
Rwyf i'n ei ystyried yn ffrind gorau dyn. Yn wir, mae'n well na dyn gan ei fod yn ufudd- a byth yn ateb yn ôl!!
Yn anffodus, mae'n dioddef o salwch sy'n effeithio ar ei arennau er, o edrych arno, anodd iawn fyddai credu fod unrhyw beth yn bod arno.
Gobaith i rai.
Roeddwn wedi anobeithio darllen am rywbeth da yn ymwneud ag anifeiliaid ond daeth rhywbeth bach i godi nghalon yn y byd creulon yma ac i ddangos fod calon o leiaf gan rai.
Trefnodd aelodau Canolfan Groeg am ofal anifeiliaid gwyllt i 30 o elyrch, dau fflamingo a dau gudyll a oedd wedi eu hanafu - oherwydd hela anghyfreithlon neu oherwydd yr eira trwm a gawsom y gaeaf diwethaf - gael eu gollwng yn rhydd yn ne-orllewin Thessaloniki.
Rwyf innau hefyd yn ceisio gwneud fy rhan gyda'r gymdeithas hon!
Yn ôl ym mis Ionawr rhoddais lety i ast grwydr dorrog a ddaeth i'r ty.
Yr oedd yn amlwg wedi ei chamdrin a'i phwno ar ei phen.
Ar Fawrth 19 cafodd bump o gwn bach. Penderfynais gadw un a bum yn ddigon ffodus i ddod o hyd i gartrefi da i'r gweddill.
Gallaf anadlu unwaith yn rhagor a theimlo rhyw bleser fy mod wedi achub nid yn unig un ci ond hefyd, bum ci bach a fyddai'n siwr o fod wedi marw.
Cefais fy syfrdanu fod cymaint o ddiddordeb gan rhai bobl mewn cwn bach yn enwedig ar ôl yr hanesion uchod.
Diolch byth fod rhai pobl garedig i'w cael o hyd.
|
