Nid yw'n annhebyg i Bontarddulais lle cefais fy ngeni gyda phawb yn adnabod ei gilydd ac yn gwybod busnes ei gilydd.Nid yn aml y cawn ein anrhydeddu â rhywun enwog yn byw yn ein plith, ond un diwrnod pwy â welais yn sefyll y tu allan i'r ffwrno ond Vasiliki Kasapi y person pwysicaf yn y dref ar hyn o bryd - gan gynnwys y Maer!!
Merch 19 oed ydy Viki, sy'n prysur wneud enw iddi'i hun yn codi pwysau. Yn ôl yn yr haf fe enillodd hat-trick yng Nghampwriaeth y Byd yng ngwlad Tsiec gyda medal arian am ddod yn ail yn nosbarth y gystadleuaeth Snatch, a medal efydd gan ddod yn drydedd yn y gystadleuaeth Jerk ac un efydd arall am ddod yn drydedd o bawb.
Medalau aur
Erbyn diwedd y llinell yr oedd wedi ennill tair medal aur ieuenctid Ewropeaidd yn Sardinia ac ar sail ei pherfformiad drwy gydol y gystadleuaeth, hi oedd y ffefryn.
Enillodd aur am ddod yn gyntaf yn nosbarth y Snatch, wedi codi 115 cilo ac un arall am ddod yn gyntaf yn y dull Jerk trwy godi 140 cilo. Y cyfanswm am y ddau oedd 255 cilo, ac fe gafodd ei thrydedd medal aur am fod yn well na phawb arall.
Proffwydodd y papurau a'r teledu ddyfodol disglair iddi gan gynnwys llwyddiant yng Nghampau Olympaidd Athen, 2004.
Dydi codi pwysau ddim yn rhywbeth yr wyf wedi ymddiddori ynddo tan hyn ond y mae gweld un o fy nghyd-drigolion yn gwneud cystal yn creu diddordeb. Gan amlaf, gweld y bobl hyn ar y teledu ydy diwedd y gân felly roedd yn achos cryn gyffro i weld Viki wyneb yn wyneb ar y stryd a chael ei llongyfarch a dymuno'n dda iddi yn Athen. Cawsom sgwrs eithaf hir gyda nifer o bobl yn torri ar ein traws yn gyson, er mwyn ei llongyfarch a dymuno'n dda iddi neu'n gofyn am ei llofnod.
Er ei bod, mae'n siwr, yn cael yr un cwestiynau byth a hefyd yr oedd Viki, yn parhau'n foesgar a chyfeillgar. Buom yn siarad am ei hymdrech yn Sardinia. Dywedodd wrthyf ei bod yn hapus iawn âr tri medal ag enillodd, ond gallai fod wedi codi mwy o bwysau yn y ddau cynigiad. Yn wir, fe gwblhawyd y dymuniad hwn yn y gystadleuaeth nesa ym mis Rhagfyr, yng ngwlad Pwyl. A welsoch fi'n wylo, Lynda? meddai ,pan dywedais wrthi fy mod wedi ei gweld ar y teledu.
Yn groten garedig ac anhunanol cyflwynodd y medalau a enillodd yn Sardinia i'w chyd gystadleuydd, Katerina Rodditi, na allodd gystadlu oherwydd anaf er iddi dorri'r record Roegaidd. Pymtheg oed oedd hi pan sylweddolodd ei hyfforddwr fod dyfodol iddi ac y mae hefyd yn taflu'r waywffon a gosod ergyd a phwysau ac y mae yn nhîm Cenedlaethol Groeg ers 2000 dan hyfforddiant Christos Iacofou sy'n ysbrydoli pawb!
Colli - ac ennill ffrindiau
Gyda'r holl ymarfer, ni fu ganddi'r bywyd cymdeithasol yr hoffai gael, a bu hyn yn rheswm iddi golli cysylltiad â llawer o'r ffrindiau oedd ganddi yn Ysgol Uwchradd Thermi. Ar y llaw arall gwnaeth nifer o ffrindiau newydd nid yn unig yn y tîm, ond yn y sesiynau ymarfer ac hyd yn oed gyda merched o wledydd eraill sy'n cystadlu yn ei herbyn. Mae'n golygu bod ffwrdd o gartref am fisoedd ar y tro hefyd.
Rwyf wedi dysgu na ellir cael y melys heb y chwerw hefyd, meddai. Braf ydy cael eich enw wedi galw allan yn fuddugwr, codi ar y pedestl a chael medal o amgylch eich gwddf. Dyma'r funud yr ydych wedi bod yn sefyll amdano. Rydych yn gwybod fod miloedd ar filoedd yn eich dilyn ar y teledu. Dyma eich eiliad chi o ysblander, gogoniant, a buddugoliaeth.
"Rydych yn clywed y gynulleidfa yn curo dwylo, gwelir hwy yn codi a sefyll mewn parch tuag atoch. Mae'r dorf i gyd ar eu traed, ac yna mae'r faner gwyn a glas yn codi. Erbyn hyn rwyf mewn rhyw ebargofiant, ond nid oes dim yn rhoi mwy o fwynhad i mi na chlywed yr anthem genedlaethol yn cael ei chwarae. Wir, does dim i'w gymharu â'r gorfoledd sy'n llenwi eich enaid ar y funud bythgofiadwy honno.
Ar y llaw arall rhaid dysgu derbyn methiant. Pryd mae'n bwysig cael cyd-gystadleuwyr wrth eich hochr. Dyna wir gyfeillgarwch: yr eiliad pan yw'n teimlo'n wan a nhw yno i'ch cynnal.
Os na fyddaf yn llwyddiannus, mae bod yn aelod o'r tîm yn brofiad eithriadol o bwysig, ar siawns i gynrychioli fy ngwlad yn fraint fawr a chael medal aur i mi fy hun, meddai.
Y funud nesaf torrodd swn canu corn ar ein traws gyda'i mam Effi, ai thad Miltiaddis yn cyrraedd a'r ddau yn datgan fod unrhyw lwyddiant i Viki yn llwyddiant iddynt hwythau hefyd. A daeth yn bryd i mi ffarwelio a dymuno'n dda i'r ferch wylaidd hon sydd wedi dod â chymaint o fri i'n tref fechan ni.
