Chwefror 1, 2006
Er nad yw gwledydd gogledd Ewrop wedi profi ofn a dychryn H5N1 hyd yn hyn mae'r awdurdodau yma yn ceisio gwneud cymaint ag sy'n feidrol bosibl i amddiffyn y wlad rhag y ffliw adar - yn enwedig ag yntau ar drothwy ein drws yn Nhwrci gyfagos.
Yn ddyddiol mae meddygon anifeiliaid yn ymarfer ar gyfer dyfodiad posibl yr haint wrth i nifer y bobl sy'n marw o'r haint yn Nhwrci gynyddu'n araf bach.
Yn sydyn mae gwlad Groeg o'r de i'r gogledd, o'r gorllewin i'r dwyrain, yn effro i'r peryglon!
Peidio teithio
Rhybuddiwyd dinasyddion Groeg mai gwell fyddai peidio â theithio i Dwrci heb fod raid. Pe byddai'n rhaid teithio mae rheolau llym ynlgŷn a chroesi'r ffin rhwng y ddwy wlad.
Ofnir mai un o'r mannau tebycaf i'r haint ledaenu yw yng ngogledd ddwyrain y tir mawr ac yno mae ceir sy'n dod i fewn i Roeg yn cael eu chwistrellu a'u diheintio yn ogystal ag esgidiau y teithwyr.
Ym mhrif faes awyr y wlad yn Athen mae arbenigwyr yn chwistrellu esgidiau teithwyr. Hwn yw'r unig faes lle mae awyrennau o Dwrci yn glanio.
Gosodwyd hysbysfyrddau mawrion yn tynnu sylw at y sefyllfa fyd-eang gydag awgrymiadau beth i'w wneud.
Cau'r ffin?
Bu'r Groegiaid yn ystyried cau'r ffin rhwng y ddwy wlad ond wedi ymgynghori â'r Undeb Ewropeaidd cytunwyd y byddai cyfyngu ar deithiau rhwng y ddwy wlad yn ddigon.
Yn ychwanegol mae swyddogion iechyd yn cadw golwg ar borthladdoedd Groeg hefyd gyda gofal arbennig parthed llongau sydd wedi glanio yn Nhwrci.
Hawdd deall y pryder cyffredinol a'r ofn o bandemig.
Ar ynys fechan Casteloriso yn yr Aegean mae pobl eisoes wedi dechrau difa eu ffowls. Hefyd yn bryderus mae trigolion Samos sydd o fewn golwg Twrci.
Effeithiodd hyn oll ar dwristiaeth ynysoedd dwyreiniol Twrci a rhoddodd trigolion ynysoedd Chios a Lesfos y gorau i'w harferiad o groesi'r dŵr i siopa ym marchnadoedd rhatach Twrci.
Cuddio ieir!
Hefyd, dechreuodd cymdogion eraill Twrci, sef Syria, chwistrellu ceir ac esgidiau ar y ffin.
Yn anffodus, er gwaethaf yr holl ymdrechion egniol mae'r pryder yn parhau yn ôl yr arbenigwyr ac ychwanegwyd at y pryderon gan ddyfodiad ugain o ymsefydlwyr anghyfreithlon o Affganistan a Mawritania trwy Dwrci i Samos.
Gwneir ymdrechion i reoli'r haint mewn anifeiliaid a lladdwyd dros fil o ffowls i leihau'r cyswllt dynol yn yr ardaloedd gwledig.
Cyhuddir rhai o geisio cuddio eu ieir ond y mae arwyddion fod y neges addysgol yn dylanwadu.
Ond darlun trist ydy hwn gan fod llawer yn dibynnu ar eu ieir am eu bywoliaeth.
Un peth sy'n sicr, mae'r Groegiaid yn ceisio gwneud cymaint ag sy'n ddynol bosibl i atal lledaeniad y salwch am y tro.
|
