 |
 |
|
Jwdas
Sioe gerdd yn cydymdeimlo â bradwr enwoca'r byd . . . |
|
|
|
Yn sioe gerdd ddiweddaraf cwmni theatr Cristnogol Cymraeg edrychir gyda chydymdeimlad ar Jwdas Iscariot - y bradwr enwocaf yn hanes y byd.
Ac yn Jwdas a berfformiwyd gan Gwmni Tystion Broydd Tywi daeth elfennau mor annisgwyl â chaneuon Elvis Presley a phroffwydoliaeth Eseia at ei gilydd.
Teimlo cydymdeimlad
Awdur Jwdas - a berfformiwyd gyntaf yn Theatr y Lyric, Caerfyrddin, nos Iau Tachwedd 7, 2006 gan y cwmni o rhyw gant o aelodau - yw Nan Lewis sy'n awdur nifer fawr o basiantau.
Eglurodd ar Bwrw Golwg sut y bu iddi gyfansoddi'r gwaith:
"Rwy'n cofio mynd i Oberamegau yn 1960 a dyna'r tro cyntaf imi deimlo cydymdeimlad gyda Jwdas - a minnau wedi teimlo fel y rhan fwyaf o bobl mai person i'w gondemnio oedd o.
"Ond wedi'r cyflwyniad yna yr oeddwn yn gweld gwedd newydd arno fe a dyna pam y dewisais i'r testun," meddai.
"Yr hyn ydw i'n wneud yw edrych ar broffwydoliaeth Eseia ac yn ôl honno yr oedd yn rhaid i rywun arwain yr Oen i'r lladdfa a dyna yw'r dehongliad sydd gyda fi - roedd Jwdas yn cael ei ddewis i arwain yr Oen i'r lladdfa, dyna yw ei dynged e.
Gofyn y cwestiwn
"Rwy'n siŵr y bydd nifer yn anghydweld â'r dehongliad yna ond rwyf i mewn cydymdeimlad ag ef ac rwy'n gobeithio y bydd y cyfan yn ennyn trafodaeth yn y diwedd gan mai dyna un o'r amcanion," meddai.
"Yn ôl dwy efengyl - Marc a Mathew - dim ond bradwr oedd e ac yn ôl Luc a Ioan mae wedi cael ei feddiannu gan Satan ac mae dyn yn gofyn y cwestiwn, Pwy sy'n dweud ei fod wedi cael ei feddiannu gan Satan? ac yn y diwedd rwy'n ceisio bod yn wrthrychol ac mae Jwdas yn gofyn y cwestiwn, Pwy sydd wedi'i ddefnyddio fe, Duw ynteu'r Diafol."
Elvis ac emynau
Dywedodd Eryl Jones, cyfarwyddwraig cerdd y sioe fod amrywiaeth o gerddoriaeth wedi'i chynnwys:
"Yr ydym ni wedi edrych ar gerddoriaeth gyfoes iawn - mae Nan Lewis yn hoff iawn o Elvis Presley ac mae hi wedi gosod geiriau sy'n gweddu i'r pasiant ond hefyd yn adlewyrchiad o gerddoriaeth Elvis Presley.
"Mae yna emynau yno, mae yna waith o'r Meseia yn clymu fewn pethau ac felly rydym ni wedi cael cerddoriaeth gyfoes, draddodiadol, seciwlar, emynau ac yn y blaen- mae pob peth yno."
Ychwanegodd i'r gwaith fod yn "sialens fawr" i'r rhai gymerai ran.
"Ond rwy'n credu eu bod nhw wedi mwynhau y profiad yn fawr iawn. Mae'n beth nad anghofia nhw byth," meddai.
Tynnu'r enwadau
Dywedodd Nan Lewis, hithau, fod y pasiant yn gyfrwng pwerus iawn i gyflwyno yr efengyl ac i genhadu..
"Ond mae yna bwrpas arall hefyd sef ein bod ni yn tynnu'r enwadau at ei gilydd ac yn y cwmni yma rwy'n siŵr bod oddeutu pump neu chwech o enwadau wedi dod at ei gilydd ac mae wedi bod yn brofiad arbennig," meddai.
Ond heb amheuaeth y pwnc dadleuol yw y dehongliad o ran Jwdas yn hanes Crist.
Beth yw eich barn chi am ei ran ef yn hanes Iesu Grist?
Bradwr, ynteu un wedi ei ddefnyddio gan Dduw i ddod a'i waith i ben - ynteu erfyn yn llaw y Diafol?
Cliciwch i ebostio eich sylwadau.
Cliciwch i weld lluniau o'r cynhyrchiad gan Hywel Rees.
|
|
|
|
|
 |
 |
 |
|
Ìý