Ar fore Gwener, 19 Mehefin, cafwyd lawnsiad Canolfan Gymunedol Brynaman dan ei enw newydd - Canolfan y Mynydd Du.
Croesawyd pawb i'r achlysur gan Mair Thomas, Is-gadeirydd y Ganolfan.
Yna daeth Mark James, Prif Weithredwr Sir Gaerfyrddin, i gyhoeddi agoriad swyddogol y ganolfan.
Cafwyd hanes datblygiad y Ganolfan o fod yn Ysgol y Babanod, Brynaman i fod yn ganolfan fywiog ac amlochrog heddiw, gan y cyn-gadeirydd Alun Howells, ac yna gair gan y Gwir Anrhydeddus Peter Hain, Ysgrifennydd Gwladol Cymru.
Daeth y Swyddog Datblygu, Siân Tucker wedyn i rannu ei gweledigaeth hi am y dyfodol a'r ddarpariaeth bellach all y Ganolfan ei chynnig i bobl y cylch.
Da oedd cael cwmni Adam Price, Aelod Seneddol ac hefyd Rhodri Glyn Thomas, Aelod Cynulliad Dwyrain Caerfyrddin a Dinefwr ynghyd â chynrychiolwyr o'r noddwyr, cynghorau a chyrff lleol.
Diolchwyd i bawb a wnaeth gyfraniad mewn arian neu amser i'r prosiect, o'i ddechrau dan ofal Susan Harries, hyd heddiw dan y staff presennol gan Mair.
Yna, gwahoddwyd pawb i fwynhau'r lluniaeth blasus oedd wedi ei ddarparu gan y bwyty ar eu cyfer.
Roedd y lle yn edrych yn lliwgar iawn gyda'r baneri a'r balwns a'r logo newydd gyda'r M fawr am Mynydd ac am Mountain.
Cyrsiau newydd i ddechrau yn y Ganolfan ym mis Medi:
• Cwrs Gradd Rhan Amser
• Helpu'ch plant i ddysgu
• Rhannu sgiliau
• Sgiliau Craidd - Magu Hyder
Hefyd mae grwp Cyfeillion Ganolfan y Mynydd Du wedi ei sefydlu ar gyfer gwirfoddolwyr a Grwp Cerdded ar gyfer y rhai sy'n teimlo'n ffit neu am deimlo'n ffitach!
Cysylltwch â Sian neu Nerys am wybodaeth bellach am unrhyw un o'r rhain.
Ìý
