�鶹Լ��

(Yn seiliedig ar ateb y Pennaeth Seattle pan geisiodd Llywodraethwr Tiriogaeth Washington brynu rhai o diroedd yr Indiaid yn 1854.)

Rwyt ti’n gweld y tir yn wyllt;
i mi, mae’n ardd erioed.
Fflamau a thân a deimli di;
minnau’n teimlo’r coed.

Cig a weli ’lawr ffroen dy wn;
gwelaf innau gnawd.
Croen a ffwr yn dy feddwl di,
yn fy meddwl innau: brawd.

Rwyt ti’n gweld erwau o wenith gwyn
a minnau’n gweld y paith.
Rwyt ti’n clywed udo yn y nos;
minnau’n clywed iaith.

Rwyt ti’n gweld argae a phibelli dŵr;
minnau’n gweld afon fyw.
Rwyt ti’n cyfri’r lle yn ddarnau aur;
minnau’n ei gyfri’n dduw.

Rwyt ti’n gweld y ddinas yn tyfu o hyd;
rwyf innau’n gweld y ddôl.
Rwyt ti’n gweld cynnydd; minnau’n gweld
y ddaear na ddaw’n ôl.