Erthygl
Beth yw erthygl?
Pwrpas erthygl yw trafod rhywbeth sydd wedi digwydd. Mae sawl math gwahanol o erthygl, ee cylchgrawn, papur newydd neu ar y we. Mae erthygl dda yn cynnwys digon o fanylion ac yn crynhoi’r prif ddigwyddiadau pwysig.
Iaith ac arddull
- Dewis pennawd trawiadol.
- Dweud beth sydd wedi digwydd yn syml, yn drefnus ac yn glir.
- Rhaid ateb y cwestiynau: pwy? beth? ble? pryd? pam? sut?
- Gall erthygl fod wedi cael ei hysgrifennu yn y presennol neu’r gorffennol.
- Rhaid ysgrifennu’r erthygl yn y trydydd person, ee ef, hi, nhw, ei, eu.
- Weithiau bydd angen i ti ddefnyddio geiriau ac ymadroddion technegol.
- Mae angen i ti ddefnyddio berfau amhersonol.
Enghraifft o erthygl papur newydd
Wrecsam yn Ennill
Ionawr 23, 2016
Wrecsam 3–1 Lincoln
Daeth rhediad gwael Wrecsam i ben gyda buddugoliaethLlwyddiant (ennill neu lwyddo i wneud rhywbeth). dros Lincoln ar y Cae Ras brynhawn Sadwrn.
Doedd y Dreigiau heb ennill mewn pedair gêm yn y Gynghrair Genedlaethol cyn ymweliad Lincoln ond roedd goliau York, Jennings a Heslop yn ddigon i ddod â’r rhediad hwnnw i ben.
Rhoddodd Matt Rhead yr ymwelwyr ar y blaen yn y chwarter awr cyntaf yn dilyn trosedd Rhys Taylor ar Jack Muldoon.
Roedd Wrecsam yn gyfartal cyn yr egwyl, serch hynny, diolch i beniad Wes York o groesiad Connor Jennings.
Jennings ei hun sgoriodd i roi’r tîm cartref ar y blaen yn gynnar yn yr ail hanner, yn manteisio wedi i Paul Farman yn y gôl wneud smonach o groesiad Dominic Vose.
Cafodd Lincoln gyfleoedd wedi hynny ond roedd Taylor yn cael gêm dda yn y gôl i Wrecsam, a roedd y tri phwynt yn ddiogel i’w dîm bum munud o’r diwedd diolch i ergyd Simon Heslop o bellter.
Mae’r canlyniad yn codi Wrecsam dros Lincoln i’r degfed safle yn nhabl y Gynghrair Genedlaethol, ond maent yn parhau chwe phwynt i ffwrdd o’r safleoedd ail gyfle.
Question
Darllena’r enghraifft o erthygl papur newydd uchod yna ateba’r cwestiynau yma:
- Pwy?
- Ble?
- Pryd?
- Pam?
- Sut?
- Pwy? Tîm pêl-droed Wrecsam
- Ble? Cae Ras Wrecsam
- Pryd? Ionawr 23
- Pam? I ddathlu bod Wrecsam wedi ennill eu gêm bêl-droed gyntaf ers amser hir
- Sut? Wedi curo tîm Lincoln o 3-1