Â鶹ԼÅÄ

A dyna ni am heddiw - ar ddiwrnod hanesyddol yng Nghymru.

Fe wnaeth y tymheredd gyrraedd 37.1C ym Mhenarlâg, Sir y Fflint - gan fynd heibio y record flaenorol am yr eildro mewn diwrnod.

Cafodd y record ei thorri'n gynt ddydd Llun wrth i'r tymheredd gyrraedd 35.3C yn ardal Gogerddan, Ceredigion.

Mae tymheredd heddiw yn uwch na darogan y Swyddfa Dywydd ar gyfer Cymru.

Ydi mae'n gynnes ac yn ôl y rhagolygon fe fydd hi'n gynnes eto fory.

Cymerwch ofal - diolch am ddarllen.

Mae gweddill straeon y dydd ar wefan Cymru Fyw.

Hwyl am y tro.

Nia Cerys
Gohebydd Â鶹ԼÅÄ Cymru

Twitter

Wedi i bobl Ceredigion gredu mai yng Ngogerddan oedd hi boethaf ddydd Llun - cafwyd diweddariad yn hwyrach gan y Swyddfa Dywydd.

Roedd hi'n boeth iawn yng Ngogerddan ond yn boethach ym Mhenarlâg yn hwyrach wrth i'r tymheredd gyrraedd 37.1C.

Dyma ddiwrnod hanesyddol wrth i gofnodion tymheredd Cymru dorri dwy record mewn diwrnod - rhyfeddol!

Ar ddiwrnod cyntaf y Sioe yn Llanelwedd roedd y system awyru newydd i oeri'r defaid yn hynod ddefnyddiol wrth i Gymru gofnodi y diwrnod cynhesaf erioed.

Roedd y system hefyd yn oeri pobl - ac yn bwysicach na dim roedd y bridwyr wedi'u plesio.

Lwcus nad heddiw oedd Ras yr Wyddfa – dyma'r olygfa o fynydd uchaf Cymru o lan Llyn Padarn.

Am 15:00 roedd y tymheredd uchaf yn Lloegr yn Cavendish sef 37.5C.

Dyma'r diwrnod poethaf eleni yn Yr Alban - 30.2C yn Aboyne

ac yng Ngogledd Iwerddon roedd y tymheredd ar ei uchaf yn 28.8C yn Aldergrove.

"Mae heddiw yn mynd i fod yn ddiwrnod prysur i ni," medd llefarydd ar ran cymdeithas foduro yr RAC.

"Mae'r olew yn poethi a'r teiars yn cael eu difrodi yn y gwres ac efallai bydd yn rhaid graeanu'r ffordd i atal cerbydau rhag llithro.

"Os oes dŵr i'w weld o dan gerbydau - peidiwch â chael ofn - mae e fwy na thebyg wedi dod o'r uned awyru," ychwanegodd.

Mae rhai rheilffyrdd wedi cael eu paentio yn wyn er mwyn delio â'r gwres llethol.

Ffynhonnell y llun, Network Rail

Heddlu De Cymru

Mae'r teulu yma'n mwynhau yn eu hetiau haul lliwgar ar draeth Aberporth.

Wel, mae 'na ddigon o le! Yn ôl trefnwr y teithiau, dyw hi ddim mor brysur â'r disgwyl.

Dywedodd Jason Zalot bod yr argyfwng costau byw yn effeithio ar sut y mae pobl yn gwario'u harian.

Mae'n gobeithio y bydd pethau'n dechrau prysuro ar ôl i'r gwres mawr ostwng ac wrth i'r gwyliau haf ddenu mwy o ymwelwyr.

Mae arbenigwyr wedi pwysleisio pwysigrwydd defnyddio eli haul sydd wed ei brynu yn y flwyddyn ddiwethaf ac mae yna gyngor i bobl fod yn ofalus os ydyn nhw'n mynd i'r dŵr.

Dywedodd Canolfan Llosgiadau a Llawfeddygaeth Blastig Cymru yn Abertawe eu bod yn barod wedi gweld cynnydd yn y nifer o blant sy'n gorfod cael eu trin am losgiadau difrifol.

"Mae llosgi dy groen yn cynyddu'r posibilrwydd o ddatblygu canser y croen," medd y nyrs Louise Scannell.

"Os wyt ti wedi llosgi'n ddifrifol cyn i ti fod yn 18 oed, does dim modd dad-wneud y niwed yna... felly mae'n bwysig iawn i wisgo eli haul."

Ffynhonnell y llun, Getty Images

Fyddai rhywun, efallai, ddim yn dewis gweithio gyda gwlân ar ddiwrnod cynhesaf y flwyddyn ond dyma Fflur Jones o Fachynlleth yn cymryd rhan yn un o’r cystadlaethau lapio gwlân.

Cyngor Wrecsam

Mae disgwyl y bydd dros 50,000 yn heidio i'r Sioe yn Llanelwedd bob dydd.

Ymhlith y dorf heddiw roedd y Prif Weinidog, Mark Drakeford.

Mae cwmnïau trên wedi rhybuddio bod cyfyngiadau cyflymdra ar y rheilffyrdd drwy'r DU, sydd yn golygu y bydd teithiau'n cymryd mwy o amser.

Mae Trafnidiaeth Cymru wedi canslo trenau sydd yn teithio drwy ardaloedd rhybudd coch y Swyddfa Dywydd.

Mae'r gwasanaethau canlynol wedi cael eu canslo: Amwythig-Birmingham, Caer-Lerpwl, Caer-Manceinion, Caer-Crewe a Crewe-Manceinion, yn ogystal â Llinell Dyffryn Conwy.

Dywedodd Network Rail fod cledrau dur yn amsugno gwres yn hawdd, a phan maen nhw'n cyrraedd tymheredd uchel mae'n bosib y gallan nhw dorri.

Ychydig o bobl oedd ar wasanaeth tanddaearol Llundain yn ystod y dydd.

Mae Wendy (canol), Dave (dde), Diane (chwith) a Gary wedi dod o Sir Amwythig i draeth Porth Trecastell ym Môn i fwynhau'r tywydd.

"Ry'n ni'n ymwybodol o'r rhybuddion ond ry'n ni wedi rhoi digon o eli haul ac mae gen i het," medd Dave.

"Ry'n am fwynhau ychydig o'r haul."

"Mae e i gyd i 'neud â synnwyr cyffredin," medd Wendy.

"Dydi o ddim fel 'dan ni erioed wedi cael tywydd fel hyn erioed o'r blaen."

Cyn heddiw roedd cofnodion yn nodi mai ym Mhenarlâg oedd y tymheredd uchaf yng Nghymru a hynny yn 35.2 ar 2 Awst 1990 ond bellach yng Ngheredigion mae'r record.

Brynhawn Llun cofnodwyd tymheredd o 35.3C.

Ydi mae enw Gogerddan yn llenwi'r cyfryngau cymdeithasol ar hyn o bryd!