Â鶹ԼÅÄ

Cychwynnodd Eisteddfod Genedlaethol yr Urdd 2007 fore heddiw yn hapus fod y nod ariannol a osodwyd i bobl Shir Gâr wedi mwy na'i chyrraedd.

Gosodwyd nod o £250,000 i'r Gronfa Leol a chyhoeddodd yr Urdd ddydd Sul i £40,000 yn fwy na hynny gael eu casglu - £290,000 i gyd.

Ac er i'r maes fod dan gwmwl o ran tywydd ddydd Sul yr oedd y trefnwyr yn hyderus y bydd yn wythnos lwyddiannus.

'Wythnos i'w chofio'
"Mae'n argoeli i fod yn wythnos i'w chofio. Mae'r gwirfoddolwyr lleol wedi bod yn gweithio'n ddygn ers pedair blynedd a mwy yn paratoi," meddai llefarydd.

"Disgwylir hyd at 100,000 o ymwelwyr i'r ardal yn ystod yr wythnos ac mae gwledd yn eu haros i gyd," meddai.

Dywedodd hefyd y bydd mwy o garafannau nag erioed o'r blaen ar y maes carafannau sy'n hynod o gyfleus ar gyfer y maes.

Ychwanegwyd fod tocynnau y sioeau nos wedi gwerthu "fel slecs".

"Roedd tocynnau sioe disgyblion yr ysgolion uwchradd ar y nos Sul a'r nos Lun yn Theatr y Lyric, wedi gwerthu allan."

A dyna pam y trefnwyd perfformiad ychwanegol y prynhawn Sul.

Nos Sadwrn yr oedd pafiliwn yr Eisteddfod bron yn llawn ar gyfer cynhyrchiad Cefin Roberts o'r sioe agoriadol, Llyfr Du gan Tudur Dylan Jones a Mererid Hopwood.

Fore Sul, er gwaethaf glaw trwm yr oedd pob sedd yn y pafiliwn yn llawn ar gyfer gwasanaeth crefyddol gan blant ysgolion Sul yr ardal.

Brwdfrydedd ac ymroddiad
Wrth edrych ymlaen at ei heisteddfod olaf hi yn drefnydd dywedodd Siân Eirian, Cyfarwyddwr yr Eisteddfod a'r Celfyddydau:

"Dwi wedi mwynhau pob munud o gydweithio gyda phobl Shir Gâr. Mae eu brwdfrydedd a'u hymroddiad nhw'n anhygoel. Maen nhw wedi gweithio, nid yn unig i sicrhau y bydd pobl ifainc y sir yn cael y profiadau gorau posibl, ond y bydd Cymru gyfan yn cael croeso yno."

Pethau newydd

Ymhlith y pethau newydd ar y maes eleni mae cystadlaethau coginio ar Fws Coginio Llywodraeth y Cynulliad.

Bydd gweithdai animeiddio ar y maes am y tro cyntaf gyda chyfle i ymuno ag animeiddwyr proffesiynol cwmni Calon i greu cartwnau ac arbrofi gyda thechneg thaumatrope a hyd yn oed ymddangos yn eich cartŵn eich hun!

Datblygiad newydd arall eleni yw'r Babell Lên gyntaf un yn Eisteddfod yr Urdd. gyda sesiwn Llên yn y Babell Luniau yn yr Arddangosfa Gelf, Dylunio a Thechnoleg am bedwar bob dydd.