Steddfod Gwilym Owen - dydd Mawrth
 Un o nodweddion annisgwyl y Brifwyl hon ydi ei bod hi yn ymddangos fel gwyl dawel a heddychlon.
O leia dydi hacs ein gwasg ddyddiol Saesneg ddim wedi canfod llawer o glecs ar y maes yma.
A hwyrach mai'r rheswm am hynny ydi fod rhai o'n prif newyddiadurwyr print wedi bod yn ffraeo efo'i gilydd.
A beth oedd pwnc yr ymrafael tanboeth ond pwy oedd yn eistedd ymhel yn Ystafell y Wasg.
Dyn y Daily Post yn honni fod criw difanars y Western Mail wedi dwyn ei gornel o!
A'r naill ochr a'r llall yn bestiff fel mulod.
Dim ond galwad i brif swyddogion y Sanhedrin ddaeth â'r rhyfel i ben.
A theg nodi mai hen wariar y Daily Post a gariodd y dydd.
O hyn allan fe all y job lot fynd ymlaen â'u priod waith o wasanaethu eu cydgyflogwyr a'u darllenwyr.
Gwyliwch y cerdyn
Nodyn bach trist rwan. S4C yn cyhoeddi eu bod nhw yn dadorchuddio cerdyn anferth wyth troedfedd o uchder ar y maes.
Ie, wir i chi, y Sianel yn trefnu i anfon cerdyn pen-blwydd ugain oed iddi hi ei hun.
Ac yn gobeithio perswadio ugain mil o lofnodwyr i'w arwyddo cyn Tachwedd pan ddethlir y diwrnod mawr.
Os llwyddir mi fydd y cerdyn yn llawer mwy apelgar i'r genedl na'r rhan fwyaf o'r rhaglenni ar y donfedd sy'n methu denu yn agos i ugain mil o wylwyr.
Trist iawn, veri sad.
Deddf gwlad
Go brin y gellid meddwl am griw llai bywiog a brwdfrydig na giang o gyfreithwyr ond mae lle i gredu y gallai darlith gan un o aelodau Cymdeithas y Cyfreithwyr yng Nghymru achosi tipyn o gynnwrf ym Mhabell y Cymdeithasau bnawn Iau.
Sut i droi camel yn geffyl fydd testun pryfoclyd Michael Jones ac yn ôl y sôn mi fydd o'n tynnu nifer o flewiach poenus o'r trwynau cyfreithiol, sefydliadol, tua Bae Caerdydd.
Dramatic
Ac aros efo'r Brifddinas roedd hi'n ddiwrnod pwysig i'r Coleg Brenhinol Cerdd a Drama yn y Brifddinas heddiw ar y maes 'ma. Diwrnod pan oedd y Coleg yn cyhoeddi drama newydd gan Meic Povey a diwrnod hefyd pan oedd yr awdurdodau Colegol yn datgan fod eu sefydliad bellach yn Conservatoire. Beth gythral ydi peth felly pan mae o adra deudwch ?
Clywed hefyd heddiw fod Côr Eisteddfod Sir Benfro Tyddewi yn gôr go unigryw - mae cynifer o'r aelodau yn byw yng Nghaerdydd nes bod yr arweinydd wedi bod yn teithio i'r Brifddinas i gynnal ymarferion. Ai gwir ai gau y sibrydion hyn.
Sylwi ar sylwebwyr
Rhai ar y maes heddiw hefyd yn holi a ydi bosus rhaglenni teledu o'r Steddfod yn rhoi pwyslais leni ar gynhyrchiadau teuluol cynnes cyffyrddus o weld dau frawd o brifardd yn doethinebu yn ystod y telediad ddoe o seremoni'r coroni. Ynte a oes yna brinder go iawn o sylwebwyr llenyddol yn yr hen Gymru fach 'ma.
Annibyniaeth
Cyhoeddiad gwleidyddol pwysig rwan. Er gwaethaf pob datganiad i'r gwrthwyneb mae Plaid Cymru Annibynnol yn fyw. Mae ganddi stondin ar y maes. Mae Owain Williams y pennaeth gwreiddiol yn bresennol - ac yn cadw cwmni iddo mae arch y ffurflenni Cyfrifiad colledig. Tybed a fydd Deryk Williams cyn reolwr yr ymarferiad hwnnw yng Nghymru yn galw i weld y diflanedig a ddogfennau.
Da o beth
A rwan rhaid troi o'r maes a mynd heibio'r arwydd rhyfeddol sy'n cyhoeddi fod yna "Wartheg Araf" ym mro'r Steddfod. Sut anifeiliaid ydyn nhw a be mae nhw'n feddwl o'r holl fuchod sanctaidd niferus sydd wedi heidio i'w libart yn Awst hwn. Da bo chi.
|
