Â鶹ԼÅÄ

Tha sinn a' comharrachadh gu bheil 70 bliadhna bho chaidh Sgoil Eòlais na h-Alba a stèidheachadh aig Oilthigh Dhùn Èideann air a' bhliadhna seo. Tron bhliadhna, cluinnidh sinn taghaidhean de chuid de na chaidh a thogail le luchd-cruinneachaidh na Sgoile, a' mhòr-chuid dheth sna 50an agus na 60an, bho dhaoine a bh' air am bogadh ann an dualchas agus beul-aithris na Gàidhlig. Chaidh an t-sreath sa a chraoladh an toiseach nuair a bha an Sgoil a' comharrachadh 50 bliadhna ann an 2001.

'S i Joina NicDhòmhnaill a tha a' cur beatha 's bàrdachd Ruaraidh Mhicleòid, Ruaraidh Cunnartach, Bàrd Chaolas Stocanais sna Bàigh sna Hearadh fon phrosbaig. B' e Harris ainm eile a bh' aig daoin' air agus rugadh e air a' chòigeamh là deug den Mhàirt ann an 1903, an dàrna duine cloinne aig Alasdair Ruaraidh ‘ain Mhoir a’ Chaolais agus Ceiteag Thormoid Bhig ‘an ‘ic Thormoid Òig. Bha e an toiseach ag obair aig a' Mhorair Leverhulme ach an uair sin chaidh e gu muir, agus sin mar a chuir e seachad a bheatha gun deach e às a rathad ann an 1965 ann an tubaisd aig muir far na Canaries agus tha e air a thiodhlacadh ann an Las Palmas.

B' iad na Leòdhasaich a bha còmhla ris aig muir a thug Ruaraidh Cunnartach air le cho geur ‘s a bha e agus ged a rinn e òrain gaoil cha do phòs e a-riamh.

'S e Tha mi fo Chùram air Cùlthaobh Èirinn òran cho ainmeil ‘s a rinn e aig àm an Darna Cogaidh, nuair a bhuail torpedo bàta a bha air taobh thall am bàta air a robh e fhèin ‘s iad a’ gabhail fasgadh an iar air Eìrinn, air an t-slighe a-null dhan Èiphit. Cluinnidh sinn Dòmhnall Iain MacSuain, Dòmhnall Iain Alasdair Bhig à Sgarasta dha ghabhail.

A thilleadh air a sin cluinnidh sinn Dòmhnall Iain Dòmhnallach, Dòmhnall Shàm à Horgabost le Òran a' Chòta, Caolas Stocanais Ghruamach agus Òran Màiri Eòghainn Chaluim. Aig Seonaidh MacAoidh, 'Am Pincidh' à Sgarasta, gheibh sinn ’S muladach mi ’n-diugh ’s mi ’g èirigh, agus tha Catrìona NicLeòid, Catrìona Fhionnlaigh Dhòmhnaill Raghnaill à Geòcrab a' gabhail Fo ghruamain mar tha mi ’n-diugh, agus òran èibhinn a rinn e, Òran na Doile.