Â鶹ԼÅÄ

Mae Ysgrifennydd Cymru wedi dweud nad oedd wedi cael gwybod am gynlluniau ei lywodraeth ei hun am y bwriad i gartrefu ceiswyr lloches mewn safle gwersyll milwrol yn ei etholaeth.

Dywedodd Simon Hart AS fod y Swyddfa Gartref wedi "cyfaddef" nad oedd y cynllun i gartrefu hyd at 230 o geiswyr lloches ar y safle ym Mhenalun ym Mhenfro wedi ei weithredu'n dda.

Ychwanegodd nad oedd "digon o barch" wedi ei ddangos i Lywodraeth Cymru a'r cymunedau lleol, oedd heb fod yn rhan o unrhyw ymgynghoriad o flaen llaw.

Yn dilyn protestiadau ar y safle dywedodd Prif Weinidog Cymru Mark Drakeford fod y datblygiad wedi bod yn darged i eithafwyr asgell dde.

Dywedodd y criw cyntaf o ddynion o Irac ag Iran oedd wedi eu cartrefu yno eu bod wedi eu dychryn gan gyflwr y safle ac mai dyma'r tro cyntaf iddynt gael eu cartrefu mewn adeiladau milwrol ers cyrraedd y DU.

Mae'r Swyddfa Gartref wedi dweud yn flaenorol ei bod wedi "gweithio ar gyflymder" i "ddarparu llety addas."

Wrth siarad ar raglen Sunday Supplement ar Â鶹ԼÅÄ Radio Wales, dywedodd Ysgrifennydd Cymru nad oedd yn "sefyllfa ddelfrydol i unrhyw un oedd yn rhan o hyn."

Dywedodd Simon Hart, sydd y cynrychioli etholaeth Gorllewin Caerfyrddin a De Phenfro ei fod wedi clywed am y cynllun gan Gyngor Sir Benfro "oedd wedi gofyn os oeddwn wedi clywed, a doeddwn i ddim, na neb arall chwaith yn hynny o beth."

Ychwanegodd: "Rwyf wedi codi'r mater gyda'r [Ysgrifennydd Cartref] Priti Patel ar dri os nad pedwar achlysur nawr, a hefyd y gweinidog mewnfudo.

"Rwy'n deall y polisi ac rwy'n deall yr anawsterau gyda Covid a llety sydd yn cyd-fynd gyda gofynion Covid, rwy'n deall yr anawsterau ar hyn o bryd o ran cludiant a'r holl bethau eraill sydd wedi arwain at hyn.

"Ond y ffaith ydy ein bod i gyd wedi darganfod hyn ar ddamwain yn llwyr achos rhyw sylw ar Facebook. Doedd dim cyswllt swyddogol.

"Nid oedd camau ymarferol y saga hon wedi eu gweithredu'n dda ac mae'r Swyddfa Gartref wedi cyfaddef hynny.

"Ni ddylie bod ni'n darganfod y pethau hyn ar ddamwain a'r ffaith fod rhywun wedi postio rhywbeth ar Facebook. Fe ddylie fod ni wedi cael gwybodaeth o flaen llaw - rhyw ddealltwriaeth o'r ffactorau aeth i mewn i'r broses o benderfynu er mwyn i ni allu esbonio i bobl sydd efallai'n bryderus am y goblygiadau."

Ychwanegodd fod "trafodaeth barhaus" rhwng yr heddlu a'r Swyddfa Gartref am arian ychwanegol i ddelio gyda'r mater.