Â鶹ԼÅÄ

Mae Llywodraeth y DU yn ystyried defnyddio cyn wersyll milwrol ger Dinbych-y-Pysgod ar gyfer cartrefu cannoedd o ffoaduriaid a cheiswyr lloches.

Mae Gwersyll Hyfforddi Penalun ymysg nifer o leoliadau sydd yn cael eu hystyried fel cartref dros dro i hyd at 250 o bobl.

Mae Ysgrifennydd Cymru Simon Hart, sydd hefyd yn aelod seneddol lleol, wedi cadarnhau fod y Weinyddiaeth Amddiffyn wedi bod yn edrych ar sawl safle ar draws y DU, gan gynnwys y safle ym Mhenalun.

Mewn datganiad ar y cyfryngau cymdeithasol, dywedodd Mr Hart ei fod wedi siarad gyda'r Ysgrifennydd Cartref am y gwersyll.

"Un safle sydd yn cael ei hystyried ar hyn o bryd yw Gwersyll Hyfforddi Penalun," meddai.

"Mae'r Swyddfa Gartref a'r Weinyddiaeth Amddiffyn yn gweithio'n galed i sicrhau fod Gwersyll Hyfforddi Penalun yn cydymffurfio gyda rheolau Covid-19 ac fe fyddai'n cael ychydig iawn o effaith ar y gymuned leol.

"Mae'r Swyddfa Gartref yn amcangyfrif y byddai'r safle yn gartref dros dro i tua 250 o bobl os yw'r dewis hwn yn cael ei dderbyn.

"Rwyf mewn cyswllt gyda'r Ysgrifennydd Cartref a Chyngor Sir Benfro sydd yn siarad gyda Heddlu Dyfed Powys a rhanddeiliaid eraill."

Dywedodd y cynghorydd lleol Jonathan Preston fod swyddogion wedi ymweld â'r gwersyll ac roedd cyfarfodydd yn cael eu cynnal i drafod y cynnig, gan gynnwys cyfarfod ddydd Llun rhwng Cyngor Sir Benfro a'r Swyddfa Gartref.

"Yr ymateb oedd nad oedd unrhyw benderfyniad wedi ei wneud ac fe fydd rhagor o gyfarfodydd gyda rhanddeiliaid eraill - gan gynnwys Llywodraeth Cymru," meddai.

"Pentref bychan yw Penalun gyda 600 o bobl ac mae'r gwersyll yn ffinio gyda'r pentref.

"Rwyf wedi awgrymu dau fale arall mwy addas - byddai safle'r Awyrlu ym Mreudeth yn well dewis gan nad yw'n cael llawer o ddefnydd.

"Mae na ganolfan yr Awyrlu yn Swinderby yn Sir Lincoln na fyddai'n effeithio cymaint ar y gymuned.

"Rwy'n deall yn iawn yr angen a'r dyletswydd i ddarparu lloches i'r bobl hyn. Ond mae pobl yn pryderu am yr effaith os bydd hyn yn digwydd ar ein diwydiant twristiaeth bregus."

Dywedodd llefarydd ar ran Llywodraeth Cymru: "Fe glywsom ni am hyn gan Lywodraeth y DU ddydd Gwener ac nid ydym eto wedi derbyn yr eglurhad llawn yr ydym wedi ofyn amdano.

"Mae Llywodraeth Cymru wedi ei hymrwymo i fod yn Genedl Lloches, ond rhaid i ni sicrhau fod anghenion ceiswyr lloches yn cael eu diwallu ac y gallwn gefnogi unigolion i ymdoddi.

"Rydym yn gweithio gyda'r partneriaid perthnasol i sicrhau fod y pryderon hyn yn cael eu hateb a bod materion iechyd cyhoeddus hanfodol yn cael eu hystyried cyn bod unrhyw un yn cael eu symud."

Fe gyfeiriodd Cyngor Sir Benfro ymholiadau Â鶹ԼÅÄ Cymru at y Swyddfa Gartref.

Dywedodd llefarydd ar ei rhan: "Yn ystod yr amseroedd digynsail hyn mae'r llywodraeth yn gweithio gydag ystod o bartneriaid ac ar draws adrannau i sicrhau llety ychwanegol ac mae'r Weinyddiaeth Amddiffyn wedi cynnig defnydd o rai o'i safleoedd.

"Wrth ddefnyddio llety wrth gefn rydym yn gweithio'n agos gyda sefydliadau, gan gynnwys awdurdodau lleol ac asiantaethau'r gyfraith i sicrhau gwerth am arian a bod ceiswyr lloches bregus, a fyddai fel arall yn amddifad, yn cael llety addas tra bod eu ceisiadau'n cael eu prosesu."