Â鶹ԼÅÄ

Mae dau achos arall o'r coronafeirws wedi'u cadarnhau yng Nghymru ddydd Llun, gydag un claf o ardal Castell-nedd Port Talbot, a'r llall o Gasnewydd.

Mae'r Gweinidog Iechyd, Vaughan Gething wedi dweud bod disgwyl y bydd rhagor o achosion o'r feirws yng Nghymru dros y dyddiau nesaf.

Ar ôl cyfarfod brys o bwyllgor argyfyngau Cobra, dywedodd: "Ry'n ni wedi disgwyl ers amser hir y byddai rhagor o achosion, ac ry'n ni'n disgwyl rhagor eto dros y dyddiau a'r wythnosau nesaf hefyd."

Roedd Mr Gething yn y cyfarfod ar y cyd â'r Prif Weinidog, Mark Drakeford a gweinidogion eraill ardraws y DU.

Prif neges y cyfarfod yw nad yw cyngor gwyddonol yn awgrymu bod rhaid cau ysgolion nac atal grwpiau mawr o bobl rhag cyfarfod mewn digwyddiadau torfol.

Does dim bwriad i ganslo'r gem rygbi rhwng Cymru a'r Alban yng Nghaerdydd ddydd Sadwrn fel rhan o Bencampwriaeth y Chwe Gwlad.

Dywedodd Mr Gething bod y feirws dal yn y cyfnod cynnar yng Nghymru a bu'n atgoffa'r cyhoedd i ddilyn cyngor am gadw hylendid personol.

Mae dau achos arall o'r coronafeirws yng Nghymru wedi cael eu cadarnhau ddydd Llun.

Mae un claf yn byw yn ardal Castell-nedd Port Talbot ac mae wedi dychwelyd o dde'r Eidal yn ddiweddar.

Mae'r ail glaf yn byw yn ardal Casnewydd ac wedi dychwelyd i Gymru o ogledd Yr Eidal.

Dywedodd Brif Swyddog Meddygol Cymru, Dr Frank Atherton: "Fe allaf gadarnhau bod dau glaf arall wedi cael prawf positif ar gyfer coronafeirws (COVID-19), sydd yn dod â'r cyfanswm o achosion newydd yng Nghymru i chwech.

"Gallwn gadarnhau nad oes cysylltiad rhwng y ddau unigolyn a bod y ddau wedi teithio ar wahân yn ôl i Gymru o wahanol rannau o'r Eidal. 

"Mae'r unigolion yn cael eu rheoli mewn lleoliadau priodol yn glinigol yn seiliedig ar asesiad gan ymgynghorydd clefydau heintus arbenigol.

"Gall y cyhoedd fod yn sicr bod Cymru a'r DU gyfan yn barod ar gyfer y mathau hyn o achosion.

"Gan weithio gyda'n partneriaid yng Nghymru a'r DU, rydym wedi gweithredu'r ymateb rydym wedi'i gynllunio, gyda mesurau rheoli haint cadarn yn eu lle i warchod iechyd y cyhoedd.

Daw hyn wrth i becynnau gael eu dosbarthu i feddygfeydd teulu ledled Cymru i'w hamddiffyn wrth iddyn nhw drin pobl maen nhw'n amau o fod â'r coronafeirws.

Bydd y 640 o feddygfeydd teulu sydd yng Nghymru yn cael pecynnau o fygydau wyneb, menig a ffedogau yr wythnos hon.

Wrth drafod dosbarthu cyfarpar diogelu personol i feddygfeydd, dywedodd Vaughan Gething, y Gweinidog Iechyd: "Mae'r pecynnau hyn yn rhan o fesurau rheoli heintiau cadarn sydd ar waith gennym, ac rwyf am sicrhau pobl ein bod yn gweithio'n agos gyda GIG Cymru a'r gwasanaethau cymdeithasol ledled y wlad.

"Mae'n bwysig bod gan staff gofal meddygol a chymdeithasol rheng flaen y cyfarpar sydd eu hangen arnynt i'w cadw'n ddiogel tra byddant yn helpu pobl yr amheuir bod ganddynt coronafeirws.

"Mae'r mygydau wyneb, y menig a'r ffedogau yn rhan o gyflenwad sydd gennym yn ein cynlluniau wrth gefn os bydd eu hangen i gefnogi ein GIG a'n gwasanaethau cymdeithasol."

Yn gynharach dywedodd Mr Gething y bydd y llywodraeth hefyd yn cyhoeddi cynlluniau ar gyfer defnyddio cysylltiadau fideo er mwyn amddiffyn staff rheng flaen y gwasanaeth iechyd.

Mae Llywodraeth Cymru wedi cadarnhau y bydd cyfreithiau newydd fydd yn cael eu cyflwyno yn San Steffan er mwyn delio â'r coronafeirws yn berthnasol i Gymru hefyd.

Bydd deddfwriaeth frys Llywodraeth y DU yn cynnwys cyflwyno rheolau newydd fydd yn caniatáu i bobl adael eu swyddi arferol am gyfnod os ydyn nhw'n gwirfoddoli i helpu mewn argyfwng.

Mae'n fwriad hefyd cyflwyno mesurau a fydd yn caniatáu i lysoedd barn ddefnyddio cysylltiadau fideo er mwyn cynnal achosion.

Hefyd fe allai staff y gwasanaeth iechyd sydd wedi ymddeol yn ddiweddar gael eu hailgofrestru ar frys os oes angen.

Ychwanegodd Mr Gething: "Mae'r grymoedd brys yma yn caniatáu i ni ymateb yn gyflym ac effeithiol i Covid-19 drwy gryfhau ein grymoedd cwarantin a grymoedd i reoli digwyddiadau torfol.

"Bydd yn caniatáu i ni gyflogi gwirfoddolwyr a staff sydd wedi gadael y Gwasanaeth Iechyd yn ddiweddar, ac yn caniatáu i ni gau ysgolion a cholegau os oes angen er mwyn rheoli'r haint.

"Diogelwch y cyhoedd yw fy mlaenoriaeth uchaf ac rydym yn gweithio yn barhaus i ddeilio ag effaith Covid-19."