06 Mehefin 2012
Fel yr , un o greawdwyr y gyfres gomedi C'mon Midffild, rai wythnosau yn ôl bydd Mr Picton a Wali Tomos yn gwneud ymddangosiad ar nos Wener Eisteddfod yr Urdd ar gyfer gêm bêl-droed arbennig iawn.
Byddan nhw'n rhan o gêm i ddathlu brwydr fawr Maes Dulyn, sef gêm a gynhaliwyd rhwng tîm Pobol y Cwm a thîm C'mon Midffild yn ystod Eisteddfod yr Urdd Dyffryn Nantlle ac Arfon yn 1990.
Y tro hwn bydd y ddau eicon comedi yn mynd ben-ben â'i gilydd gyda thîm Arthur Picton yn wynebu Tîm Wali Tomos. Bydd Tecwyn 'Tecs' Parry yn dychwelyd i'r maes am y tro cyntaf ers ugain mlynedd fel Capten Tîm Arthur Picton, a Malcolm Allen, y cyn bêl-droediwr proffesiynol a sylwebydd Sgorio yn gapten y tîm arall.
Mae eraill o'r timau gwreiddiol yn gobeithio ymddangos ar y cae, ond bydd criw Rownd a Rownd a Sgorio yn rhan o sgwad enfawr Tîm Mr Picton. Criw Â鶹ԼÅÄ Radio Cymru - Dylan Jones, Meilir Owen ac eraill - fydd yn helpu Wali Tomos.
Bydd y cyfan yn digwydd nos Wener, 8 o Fehefin 2012 ar gae pêl-droed Nantlle Vale ym Mhenygroes ger Caernarfon.
Bydd gêm 1990 yn cael ei chwarae ar sgrîn fawr a bydd maes Clwb Pêl-droed Dyffryn Nantlle yn cael ei agor yn swyddogol ar ei newydd wedd fel rhan o ddathliadau'r noson.
Yn ôl Aled Jones Griffiths, Rheolwr y Clwb, mae hi'n fraint gwahodd ymwelwyr ag Eisteddfod yr Urdd a phobl leol i'r maes newydd: "Rydyn ni wrth ein boddau bod digwyddiad mor fawr yn digwydd eto yma yn Nantlle Vale. Nôl ym 1990, pan oedd Steddfod yr Urdd yma ddiwethaf, roedd 3,000 o bobl yn gwylio'r gêm rhwng Bryn Coch United a Phobol y Cwm. Doedd dim modd symud yma, roedd ceir ym mhobman, ac roedd hi'n orlawn. Fe gawson ni amser gwych!
"Bydd cyfle nos Wener yma i ddathlu penllanw'r gwaith buddsoddi sydd wedi bod yn y Clwb, diolch i nawdd hael, a chyfle i ni nodi'r digwyddiad gyda noson hwyliog. Bydd gemau i'r plant, bwyd a diod a sgrin fawr ar y cae i wylio gêm 1990. Gobeithio'n wir y bydd torf fawr yma eto i greu awyrgylch hwyliog i blant, pobl ifanc, teuluoedd a'r to hŷn sy'n ddigon hen i gofio miri gêm y gorffennol. Mae'n braf iawn croesawu'r Urdd yn ôl i'r ardal, ac rydym yn dymuno'n dda i'r Eisteddfod gydol yr wythnos," eglura Aled Jones Griffiths.
Y dyfarnwr, fel yn y gêm wreiddiol yn 1990, fydd y Barnwr Nic Parry.
Mae'r gêm i ddechrau am 6.45 o'r gloch, gyda digwyddiadau eraill ar y maes ynghynt. Tâl mynediad yn £3 a phlant am ddim.
