Â鶹ԼÅÄ

Dyw pethau ddim yn aros yn gyfrinachol yn hir iawn yn y Cynulliad. Cyrhaeddodd y ddau gopi o'r cyngor cyfreithiol ynghylch sefyllfa John Dixon ac Aled Roberts swyddfa'r Â鶹ԼÅÄ o fewn munudau ddoe. Mae Betsan wedi blogio ynghylch y cynnwys ar ei thudalen newydd sgleiniog yn fan hyn. Does dim llawer o bwrpas ail-adrodd y cyfan yn y gornel fach dlawd a chyntefig hon o'r we.*

Yn y bôn dyw'r sefyllfa ddim mor gymhleth â hynny. Unig obaith Aled a John o gael sedd yw trwy bleidlais yn y Cynulliad. Mae holl ymdrechion y Democratiaid Rhyddfrydol wedi eu canolbwyntio felly ar sicrhau cynnal dwy bleidlais ynghylch yr achosion yn y Cynulliad cyn i swyddogion cyfri Gogledd a Chanol De Cymru ddarparu enwau'r ail ymgeiswyr ar y rhestr i swyddfa Clerc y Cynulliad. Efallai bydd modd cynnal pleidlais, efallai ddim.

Os ydy'r Democratiaid yn llwyddo yn eu hamcan gyntaf y dasg wedyn fydd darbwyllo mwyafrif i ganiatáu i'r naill ymgeisydd neu'r llall neu'r ddau ymuno a'r Cynulliad. Er y byddai'r bleidlais yn rhai rhydd dyw pethau ddim yn argoeli'n dda. Dydw i ddim wedi cwrdd ag un Aelod Cynulliad y tu hwnt i rengoedd y Democratiaid Rhyddfrydol sy'n bwriadu cefnogi'r ddau. Mae 'na hen ddigon ar y llaw arall sy am weld y ddau'n cael eu cau allan.

Serch hynny fe ddylai'r aelodau sy'n wrthwynebus i'r ddau rhoi sylw manwl i un cymal arbennig yn cyngor cyfeithiol sef hwn.

"Any consideration of whether to disregard the disqualification is quasi-judicial in nature and cannot lawfully be influenced by party political considerations"

Y ddadl a glywir amlaf gan y rheiny sydd am gau'r drws ar John ac Aled yw hon; "mae pawb yn gwybod yn iawn beth fyddai'r Democratiaid Rhyddfrydol yn gwneud mewn amgylchiadau tebyg". I fod yn blaen am y peth mae gwleidyddion y pleidiau eraill sydd wedi eu cythruddo ers blynyddoedd gan dactegau ymgyrchu'r Democratiaid Rhyddfrydol yn gweld cyfle am ychydig bach o ddial. Mae'r holl "rasys dau geffyl", y siartiau bar a'r honiadau mai " dim ond y Democratiaid Rhyddfrydol all guro XXX yn fan hyn" wedi dychwelyd i frathu'r blaid ar ei thin.

Y cyfan ddywedaf i yw hyn. Efallai ei bod hi'n anorfod bod gwleidyddiaeth yn chwarae rhan mewn busnes fel yr un yma ond peth peryg iawn yw dweud hynny ar goedd. Os ydy gwrthwynebwyr John ac Aled am osgoi'r posibilrwydd o orfod mynd i gyfraith taw pia'i hi.

*Dydw i ddim yn eiddigeddus, onest. Mae technoleg y dudalen sgleiniog ymhell y tu hwnt i alluoedd fy Sinclair ZX Spectrum.

• Llyfrnodi gyda
• del.icio.us |
• Digg |
• Newsvine |
• |
• Reddit
• - Beth yw hwn?

Mae delio gyda chwynion - swyddogol ac answyddogol yn rhan o'n bara beunyddiol yma yn Uned Wleidyddol y Â鶹ԼÅÄ. Mae rhai yn haws delio a nhw nac eraill. Mae'r gwyn ddiweddaraf, un answyddogol diolch byth, yn un y byddai angen cyfreithiwr neu ddiwinydd i'w hateb.

Os ydych chi'n edrych ar y tudalennau newyddion fe wnewch chi weld ein bod yn cyfeirio at Aled Roberts a John Dixon fel 'Aelodau Cynulliad sydd wedi eu diarddel'. Yn ôl yr achwynwr, rhyw un reit uchel yn y Cynulliad, mae hynny'n anghywir. Dyw'r ddau ddim yn Aelodau Cynulliad a dydyn nhw erioed wedi bod yn Aelodau Cynulliad - hynny er eu bod wedi cymryd y llw, wedi derbyn cardiau adnabod ac er bod swyddfeydd wedi clustnodi ar eu cyfer.

Efallai bod hynny'n gyfreithiol neu'n ddiwinyddol gywir. Rwy'n gobeithio y gwnewch chi faddau'r llaw-fer newyddiadurol. Fe fyddai'n drysu pawb be bai ni'n gorfod disgrifio Aled fel cyn-arweinydd Cyngor Wrecsam neu Gadeirydd Pwyllgor Gwaith yr Eisteddfod!

Ta beth am hynny mae gobeithion Aled a John o fyw trwy'r storm a chymryd seddi yn y Cynulliad yn lleihau a hynny am resymau gwleidyddol yn hytrach na rhai cyfreithiol.

Mae 'na grynodeb trylwyr o'r sefyllfa gyfreithiol draw ar flog Betsan. Ai ddim dros yr un tir eto. Pwynt arall sydd gen i sef hwn. Hyd yn oed os ydy'r cyngor cyfreithiol yn cadarnhau bod gan y Cynulliad yr hawl i ganiatáu i Aled a John fod yn aelodau fe fyddai'n rhaid i'r Democratiaid Rhyddfrydol sicrhau cefnogaeth y pleidiau eraill er mwyn i hynny ddigwydd.

Yn ogystal â'r cwestiynau cyfreithiol mae 'na gwestiwn gwleidyddol hefyd felly a dros y pedair awr ar hugain diweddaraf mae agweddau'r tair plaid arall wedi caledu - a hynny mewn modd anffafriol i'r ddau 'aelod'.

Yn y cyd-destun hwnnw mae'n ddiddorol nodi bod rhai yn y byd gwelidyddol, gan gynnwys rhai yn rhengoedd y Democratiaid Rhyddfrydol, yn dechrau gwahaniaethu rhwng y ddau achos. Yn achos Aled maen nhw'n nodi nad oedd y Tribiwnlys Prisiau ar restr y cyrff oedd wedi eu gwahardd a gyhoeddwyd yn 2006. Y rhestr honno oedd yn ymddangos ar wefan y Cynulliad adeg yr etholiad. Roedd y Tribiwnlys ar restr 2010 - yr un sydd ar wefan y Comisiwn Etholiadol ond mae 'na rhyw faint o "wriggle room" gan Aled. Mae'r Cyngor Gofal, y corff yr oedd John Dixon yn aelod ohono, ar y llaw arall ar y ddwy restr. Yn ogystal dyw aelodau'r Comisiwn Prisiau ddim yn derbyn tal am eu gwaith. Mae aelodau'r cyngor gofal ar y llaw arall yn derbyn £4,752 y flwyddyn.

Beth fydd diwedd y stori hon? Dyn a wyr ond mae'n ddigon posib y bydd y ddau allan, y ddau yn ôl neu hyd yn oed un mas ac un mewn.

• Llyfrnodi gyda
• del.icio.us |
• Digg |
• Newsvine |
• |
• Reddit
• - Beth yw hwn?

Nawr pe bai ni'n byw yn y Dwyrain Canol yn y pumdegau neu Ddwyrain Ewrop yn y pedwardegau fe fyddai Llafur yn defnyddio ei mwyafrif dros dro yn y Cynulliad i gyhoeddi stad o argyfwng a allai bara am ddegawdau!

Nid lle fel 'na yw'r Bae - diolch byth. Eto i gyd dyw Llafur ddim yn orawyddus i ddatrys problemau "technegol" Aled Roberts a John Dixon a'u caniatáu i eistedd yn y siambr.

Am gyfnod byr felly fe fydd gan Lafur fwyafrif gweithredol yn y siambr - mwyafrif a allai fod yn ddefnyddiol wrth wneud ambell i benodiad. Mae rhai yn credu mai dyna yw cymhelliad y grŵp Llafur am wrthod cefnogi cynnig gan y Democratiaid Rhyddfrydol i faddau camweddau Aled a John. I eraill mae'n brawf bod malais llwythol Llafur Cymru yn codi ei ben eto dyddiau'n unig ar ôl i Carwyn Jones gyhoeddi ei dranc.

Efallai bod 'na elfen o wirionedd yn y ddau gyhuddiad, efallai ddim. Ond gallwn fod yn gwbwl sicr o un peth - sef hyn. Mae'r hyn wnaeth Aled a John - neu yn hytrach yr hyn na wnaethon nhw - yn erbyn y gyfraith. Efallai bod hi'n fater o esgeulustod ar ran eu plaid ond dyw anwybodaeth o'r gyfraith ddim yn amddiffyniad mewn llys barn ac oni ddylai corff sydd newydd dderbyn pwerau i lunio cyfreithiau barchu cyfreithiau sy'n bodoli eisoes? Pa neges fyddai'n cael ei danfon i'r etholwyr pe bai tor-cyfraith yn rhywbeth "technegol" i'w wyrdroi ar fympwy trwy bleidlais fwyafrifol?

Beth sy'n debyg o ddigwydd felly? Wel ar ôl cyfnod o sach liain a lludw mae'n debyg y bydd Aled a John yn cael eu cardiau adnabod - a'u swyddfeydd yn ôl. Dyw hi ddim yn debyg y bydd y naill na'r llall yn cael ei ddiarddel gan greu agoriad i ymgeiswyr eraill ar eu rhestri. Am y tro felly ni fydd Eleanor Burnham yn dychwelyd i'r cynulliad - er cymaint y golled ar ei hol!

Ond hyd yn oed os ydy'r Cynulliad yn pleidleisio i ganiatáu i Aled a John gymryd ei seddi fe fyddai eu hethol o hyd yn agored i her yn y llysoedd. Mae'n ymddangos bod 'na siawns go dda y byddai her o'r fath yn llwyddo ond mae'n anodd pwy yn union fyddai'n elwa trwy ddod ac achos o'r fath.

• Llyfrnodi gyda
• |
• |
• |
• |
• - Beth yw hwn?

Diawch mae heddiw'n brysur! Hyd yma cafwyd enwau'r cabinet, datganiad Ieuan Wyn Jones a newid enw y Llywodraeth - a'r cyfan ar ddiwrnod "Dau o'r Bae". Mae'n amlwg bod y traddodiad o ddyddiau Gwener tawel wedi hen ddiflannu!

Cewch weld siâp y cabinet newydd ar y dudalen newyddion. Mae 'na ambell i beth trawiadol yn ei gylch. Y cyntaf yw bod ambell i swydd ac ambell i adran sydd wedi bodoli o'r cychwyn cyntaf wedi diflannu neu israddio. Mae'n rhyfedd peidio gweld Gweinidog Cefn Gwlad yn y cabinet, er enghraifft, yn enwedig o gofio mai yn y swydd honno y gwnaeth Carwyn Jones ei enw.

Mae symud y cyfrifoldeb am y Gymraeg i'r Gweinidog Addysg yn syniad sydd wedi bod o gwmpas ers peth amser ac yn sicr mae'n gwneud synnwyr wrth edrych ar ddeiliaid yr Adran Addysg a'r Adran Dreftadaeth. Gall neb amau ymroddiad Leighton Andrews tuag at yr iaith. Ar y llaw arall mae'n wleidydd sydd ddim yn ofni dweud ei ddeud na thynnu blew o drwynau sefydliadol. Fe ddylai'r blynyddoedd nesaf bod yn ddiddorol a dweud y lleiaf.

O ganlyniad i'r penderfyniad ynghylch yr iaith mae adran newydd Huw Lewis yn cynnwys cyfuniad braidd yn rhyfedd o bynciau. Y "Department of Odds and Sods" oedd disgrifiad un newyddiadurwr o bortffolio sy'n cynnwys Tai, Adfywio a Threftadaeth. Dyw hynny ddim o reidrwydd yn ddrwg o beth. Mae modd defnyddio'r celfyddydau a threftadaeth fel rhan o gynlluniau adfywio, er enghraifft, ond dydw i ddim cweit yn deall lle mae Tai yn ffitio i mewn.

Y cwestiwn mawr wrth gwrs yw ai Cabinet am bum mlynedd neu bump mis yw hwn? Y naill na'r llall yw'r ateb yn fy marn i. Cabinet i gadw'r opsiynau'n agored yw hwn gyda digon o weinidogion i weithio'n effeithiol ond yn ddigon hyblyg i ganiatáu newid naill ai er mwyn gwneud lle i weinidogion Clymblaid neu newydd-ddyfodiaid Llafur.

Beth felly am gyhoeddiad Ieuan Wyn Jones? Mewn sawl ystyr doedd dim byd annisgwyl yn ei sylwadau. Doedd neb yn disgwyl iddo arwain ymgyrch y blaid yn 2016. Mae'n debyg mai prif bwrpas datganiad heddiw oedd tawelu unrhyw alwadau am ornest gynnar i ddewis ei olynydd.

Ond beth yw cymhelliad Dafydd Elis Thomas sy'n prysur ensynio y byddai'n fodlon sefyll fel ymgeisydd am yr arweinyddiaeth?

Mae'n anodd osgoi'r casgliad mai ceisio tanio ergyd cychwyn i'r ras mae'r cyn-lywydd.

• Llyfrnodi gyda
• |
• |
• |
• |
• - Beth yw hwn?

Dyw trefniant y seddi yn siambr y Cynulliad ddim bob tro yn gweddu i niferoedd y pleidiau. Dyw e hi ddim yn anarferol felly i weld "un dyn bach ar ôl" ar yr ochor anghywir i ryw eil neu'i gilydd. Ond hyd yn oed os ydy hynny'n digwydd mae'r aelod yn weddol o agos at weddill ei blaid. Nid felly y tro hwn.

Yng nghornel pellaf y meinciau Llafur y mae sedd 41 - y sedd yr oedd Rhodri Morgan yn eistedd ynddi ar ôl rhoi'r gorau i fod yn Brif Weinidog. Hon yw sedd Dafydd Elis Thomas yn y pedwerydd Cynulliad ac mae'n golygu bod y cyn-lywydd wedi ei wahanu o weddill aelodau Plaid Cymru nid dim ond gan aelodau Llafur ond hefyd gan y Democratiaid Rhyddfrydol.

Nid felly oedd pethau i fod. Mae'n debyg bod cynllun gwreiddiol y Comisiwn wedi gosod Dafydd gyda'i blaid ond bod fe'i hun wedi gofyn am y newid.

Dydw i ddim yn gwybod beth sydd mor arbennig am sedd 41 yng ngolwg Dafydd neu am ba reswm yr oedd e'n amharod i eistedd gyda'i gyd-bleidwyr ond teg dweud bod rhai o'r rheiny yn poeri gwaed ynghylch y peth.

• Llyfrnodi gyda
• |
• |
• |
• |
• - Beth yw hwn?

Hwyrach mae'r ffaith bod 'na ddau Andrew Davies yn y Cynulliad oedd yn gyfrifol am y nifer o lysenwau mae'r aelod Ceidwadol o'r enw yna wedi eu denu. "RT" - priflythrennau ei enwau canol yw'r mwyaf cyffredin er bod "then-then" yn cael ei glywed yn bur aml hefyd. Tuedd Andrew i ail-adrodd y gair olaf mewn brawddeg yw'r sail i'r ail lysenw. Dydw i ddim yn gwybod ai rhywbeth tafodieithol ym Mro Morgannwg yw'r arfer ond mae'n drawiadol ta beth-beth!

Heb os Andrew Davies yw'r ceffyl blaen yn y ras i olynu Nick Bourne fel arweinydd y Ceidwadwyr. Ers iddo ymddiswyddo o gabinet y Ceidwadwyr mae Andrew wedi treulio cryn dipyn o amser yn "helpu allan" ar lawr gwlad - yn mynd o ginio i swper, o ffair haf i ffair Nadolig gan swyno aelodau cyffredin y blaid - yr union rai fydd yn ethol yr arweinydd newydd. Does dim dwywaith chwaith bod eu safbwyntiau cymharol asgell dde ac unoliaethol yn boblogaidd ymhlith y ffyddloniaid.

Gobaith gwrthwynebwyr Andrew yn y Cynulliad diwethaf oedd y byddai'n bosib ei rwystro rhag cyflawni ei uchelgais trwy ddefnyddio rheolau'r blaid. Yn ôl y rheolau hynny dyletswydd grŵp y Cynulliad yw dewis dau enw o'u plith i'w gosod gerbron yr aelodau cyffredin mewn etholiad arweinyddol. Y gred oedd y byddai'n bosib sicrhau nad oedd enw Andrew yn un o'r rheiny ond mae'r gobaith hwnnw wedi diflannu o ganlyniad i'r gwaed newydd sydd wedi cyrraedd y Bae. Mae gan ambell i aelod newydd ffafrau i ad-dalu - a gall Andrew fod yn weddol sicr o gael ei enw ar y papur.

Y cwestiwn sy'n wynebu ymgeiswyr posib eraill yw p'un ai i sefyll yn erbyn Andrew ac wynebu'r posibilrwydd o gael crasfa ai peidio. Gallai peidio sefyll ymddangos yn llwfr. Ar y llaw arall mae 'na ambell i Geidwadwr o'r farn y gallai Andrew faglu fel arweinydd oherwydd byrbwylltra. Mewn sefyllfa felly fe fyddai gan y grŵp yr hawl i'w diorseddi a dewis arweinydd arall heb droi at yr aelodau cyffredin.

Beth fyddai Machiavelli'n dweud, tybed?

• Llyfrnodi gyda
• |
• |
• |
• |
• - Beth yw hwn?

Dyma fi yn ôl yn y Cynulliad ar ôl hoe fach. Nid bod yr awyrgylch o newydd-deb wedi disbyddu. Gyda bron i chwarter yr aelodau yn newydd-ddyfodiaid mae'n teimlo braidd fel diwrnod cyntaf blwyddyn ysgol newydd gydag aelodau yn crafu eu pennau wrth geisio cofio'r ffordd i'w swyddfeydd.

Nid bod y gwleidydda heb gychwyn wrth reswm. Cewch ddarllen ar y dudalen newyddion am ymdrechion Carwyn Jones i ffurfio llywodraeth a'r stranciau ynghylch swydd y Llywydd. Y cyfan ddywedaf i am y rheiny yw bod Carwyn wedi chwarae ei law bron yn berffaith a bod y Ceidwadwyr wedi gor-chwarae eu llaw hwythau trwy geisio sicrhau'r swydd i Angela Burns heb sgwario'r peth gyda'r gwrthbleidiau eraill.

Rosemary Butler a William Graham yw'r cyfuniad tebygol newydd yn swyddfa'r Llywydd. Yn ôl Tomos Livingstone hwn fydd y tro cyntaf i William gael y profiad o weithio i Fwtler - yn hytrach na chyflogi un! Jôc yw hynny - efallai!

Ta beth , mae Carwyn yn llygad ei le i oedi ychydig cyn ceisio cyrraedd cytundeb gydag un neu fwy o'r pleidiau ynghylch llywodraethu Cymru dros y pum mlynedd nesaf. Tra bod rhai yn rhengoedd y Democratiaid Rhyddfrydol yn awchu am glymblaid er mwyn dianc rhag stigma "Con-Demiaeth" fe fydd angen peth amser ar Blaid Cymru i ystyried ei hopsiynau. Fe fydd Carwyn yn ymwybodol y caiff e well bargen os oes modd chwarae'r ddau bartner posib yn erbyn ei gilydd. Mae aros a disgwyl yn gwneud synnwyr perffaith felly.

Yn y cyfamser mae Plaid Cymru yn llyfu eu clwyfau ac yn cychwyn ar ei "dadansoddiad" o'r hyn aeth o le. Un targed yw cyfansoddiad Bysantaidd y blaid a'i fôr o bwyllgorau rhanbarth a thalaith, ei Chyngor Cenedlaethol a'i Phwyllgor Gwaith.

Yn yr hen ddyddiau roedd cynhadledd Plaid Cymru yn treulio oriau bob blwyddyn yn "twtio'r" cyfansoddiad. Nid gor-loddesta oedd yr unig reswm i gynrychiolwyr gadw draw o Neuadd y Brenin ar fore Sul! Doedd cynigion megis "yng nghymal 27(ch)ii yn lle 'etholaeth' rhoddir 'rhanbarth' " ddim yn apelio at lawer o bobol ac eithrio dyn o'r enw Richard Fatorini o Borthcawl - yr unig berson oedd yn deall y peth.

Efallai'n wir ei bod hi'n amser i Blaid Cymru foderneiddio ei chyfansoddiad. Yn sicr mae Ieuan Wyn Jones a'i ragflaenwyr wedi cael amser caled, gan y Pwyllgor Gwaith yn arbennig, ar adegau. Mae'n wir i ddweud hefyd nad yw hanfod y strwythurau wedi newid ers dyddiau Saunders Lewis a'u bod yn glogyrnaidd a dweud y lleiaf.

Ar y llaw arall go brin y gellir beio'r cyfansoddiad am amharodrwydd yr etholwyr i gefnogi'r blaid.

• Llyfrnodi gyda
• |
• |
• |
• |
• - Beth yw hwn?

I'r rheiny ohonoch chi sy'n dilyn y pethau 'ma mae'r bwcis "Paddy Power" wedi rhyddhau datganiad yn cyhoeddi eu bod wedi derbyn betiau sylweddol yn darogan na fydd Llafur yn ennill mwyafrif yn y Cynulliad.

Efallai'n wir, efallai ddim. Mae'n debyg mai ychydig gannoedd o bleidleisiau mewn ambell i fan fydd yn penderfynu'r peth.

Dyna o leiaf yw barn y rhan fwyaf o hen bennau'r pleidiau - gan gynnwys rhai Llafur, gyda llaw.

Beth felly am ddarogan yr arolygon barn sydd wedi bod yn awgrymu gwell ganlyniad i Lafur felly?

Rwyf wedi sôn o'r blaen am yr amheuon sydd gan rai am fethodoleg RMG clarity ond mae 'na bwynt pwysig i gofio ynghylch methodoleg dadansoddi YouGov hefyd.

Yn ôl arolwg YouGov i'r Byd ar Bedwar dyma sut mae'r frwydr etholaethol yn edrych ar hyn o bryd.

Llafur; 45%
Ceid.: 20%
Plaid 18%
Dem Rhydd. 8%

A dyma'r darlun rhanbarthol.

Llafur 41%
Ceid. 20%
Plaid 18%
Dem Rhydd 7%
UKIP 7%
Gwyrdd 4%
BNP 3%
Eraill 2%

Mae'r ffigyrau yna wedi eu cymhwyso i gymryd y tebygolrwydd o bleidleisio i ystyriaeth. Yn achos YouGov mae hynny'n golygu rhoi pwys mawr ar ddewisiadau'r rheiny sy'n sicr o bleidleisio a rhyw faint o bwys ar atebion y rheiny sy'n "debygol" o bleidleisio.

Mae hynny ychydig yn wahanol i fethodoleg cwmnïau eraill. Mae'r rheiny ar y cyfan ond yn cymryd atebion y rheiny sy'n sicr o bleidleisio i ystyriaeth gan anwybyddu'r pleidleiswyr "tebygol".

Beth felly fyddai'r canlyniad pe bai YouGov yn defnyddio'r un fethodoleg a chwmnïau eraill?

Wel, dydw i ddim wedi gweld dan foned arolwg y Byd ar Bedwar. Rwyf wedi gweld a chlywed manylion rhai o arolygon eraill y cwmni ac yn yr achosion hynny pe bai'r fethodoleg amgen yn cael ei defnyddio fe fyddai Llafur ychydig yn is, Plaid Cymru ychydig yn uwch a'r pleidiau eraill fwy neu lai'r un peth.

Dyw'r newidiadau ddim yn enfawr ond maen nhw'n ddigon i gynnig naratif gwahanol o'r hyn sy'n digwydd ar lawr gwlad i'r un mae YouGov ei hun yn cynnig. O ddefnyddio methodoleg YouGov ceir darlun o Lafur yn ennill tir ar draul y Democratiaid Rhyddfrydol a Phlaid Cymru gyda'r Ceidwadwyr yn dal eu tir. O ddefnyddio methodoleg cwmnïau eraill mae'n ymddangos bod bron y cyfan o'r cynnydd Llafur yn dod o'r Democratiaid Rhyddfrydol a nemor ddim o Blaid Cymru.

Does dim modd gwybod eto pa ddarlun sydd agosaf at y gwir ond mae'r gwahaniaeth yn fodd i'n hatgoffa nad wyddor berffaith yw dadansoddi arolygon a bod llunio naratif etholiadol ar eu sail yn hynod beryglus.

• Llyfrnodi gyda
• del.icio.us |
• Digg |
• Newsvine |
• |
• Reddit
• - Beth yw hwn?