Â鶹ԼÅÄ

Cha deach cùisean a-rèir a' phlana.

Bha na Làbaraich airson bhòtadh an aghaidh a' bhuidseit gus cothrom a thoirt dhaibh a' choire airson ghearraidhean a chur air an SNP.

Oidhche mhàirt, bha cuid dhiubh ag ràdh gun robh an coltas gum faigheadh Iain Swinney taic bho na Lib Deamaich agus na Tòraidhean ga dhèanamh nas fhasa dhaibh sin a dhèanamh.

Ach an uair sin chaidh rudeigin ceàrr.

Lorg Mgr Swinney an t-airgead gus àiteachan trèanaidh a bharrachd a chur a-steach don bhuidseat, an rud a bu mhotha a bha na Làbaraich ag iarraidh anns na còmharaidhean.

Agus, ged nach robh taic nan Làbarach a dhìth air aig a' cheann-thall, chum e seo anns a' bhuidseat aige co-dhiù.

Cleas

'S e cleas glic a bha seo bho Mhgr Swinney, a tha air cliù a thogail mar shionnach seòlta aig àm a' bhuidseit.

Thug e cothrom dha casaid cealgaireachd a chur air na Làbaraich - an dàrna turas an t-seachainn-sa a chuir an SNP a' chasaid sinn orra.

Agus nì e nas duilghe do na Làbaraich gan cur fhèin ron luchd-bhòtaidh mar phàrtaidh nan cosnaidhean as dèidh dhaibh bhòtadh an aghaidh airgid airson àiteachan trèanaidh a dh'iarr iad ro làimh.

Tha na Làbaraich air a bhith gan dìon fhèin an-diugh, ag ràdh nach deach gnìomhan Mhgr Swinney air cosnaidhean fada gu leòr.

Agus thug iad slaic air an SNP airson bhòtadh le 'pàrtaidhean na co-bhanntachd'.

Ach ma tha sibh ag iarraidh fios air beachd Iain Gray mun bhùrach a tha seo, seall mar a dh'fheuch ceannard nan Làbarach a' chùis a sheachnadh aig ceistean a' Phrìomh Mhinisteir an-diugh.

Gearraidhean

'S e buidseat duilich a bha seo do Mhgr Swinney agus do labhraiche ionmhais nan Làbarach, Anndra Kerr.

Fon lagh, b' fheudar do dh'Iain Swinney buidseat fhaighinn tron phàrlamaid.

Chan eil cumhachd aige air meud a' bhuidseit sin ach air an iomall agus cha robh taic anns an t-seòmar airson cumhachdan na pàrlamaid a chleachdadh gus a' chìs cosnaidh a chur suas.

Mar sin, cha robh roghainn aige ach buidseat a chur troimhe a tha mu £1bn nas lugha na bha e an uiridh.

Agus mar mhinistear ann an riaghaltas gun mhòrchuid, b' fheudar dha taic a lorg far a b' urrainn dha - an turas-sa bhon dà phàrtaidh a tha a' cur nan gearraidhean an gnìomh aig Westminster.

B' e tuairmse nan Làbarach gum fàgadh an dà rud sin gun tèid an SNP a choireachadh leis an luchd-bhòtaidh airson nan gearraidhean sin.

Ribe

'S dòcha gun tachair sin fhathast.

Ach aig deireadh na seachdainn seo, 's iad an SNP a tha a' coimhead nas toilichte.

Ann an dòigh, 's dòcha nach b' urrainn do na Làbaraich taic a chur ri buidseat an SNP cho faisg air an taghadh.

As dèidh dhaibh rudan iarraidh air Iain Swinney a b' urrainn dha thoirt seachad - gu ìre co-dhiù - rinn iad ribe dhaibh fhèin a bha Mgr Swinney glè dhèonach chleachdadh.

Chan eil an taghadh oirnn fhathast.

Ach cha b' e seo an toiseach don iomairt aca a bha na Làbaraich ag iarraidh.

• Comharraich le
• |
• |
• |
• |
• - Dè tha seo?

Nuair a chaidh bomaire Locarbaidh a shaoradh ann 2009 bha beachd aig a h-uile duine mu dhèidhinn.

Carson nach biodh? 's i an ionnsaigh ceannairc bu mhiosa air Breatainn a-riamh, anns an do bhàsaich 370 duine.

Ach chum Gòrdan Brown a bheachd am falach agus e ag ràdh gur e cùis do mhinistearan Albannach a bha innte a-mhàin.

Tha dearbhadh againn a-nis ge-tà, gun robh beachd aig Riaghaltas Bhreatainn, fear a bha gu math eadar-dhealaichte bho na dh'fhoillsich an càirdean Làbarach aig Holyrood.

´¡-°ùè¾±°ù , bha an riaghaltas mu dheireadh airson 's gun dèidheadh Abdelbasset ali Mohmed al-Megrahi a shaoradh.

Ach aig a' cheart àm, ge-tà, fhuair e nach robh fianais gun do dh'iarr Riaghaltas Ghòrdan Brown air an SNP sin a dhèanamh.

Aire

A dh'aindeoin sin, dh'innis Dàibhidh Camshron do Thaigh nan Cumantan gum bu chòir don riaghaltas mu dheireadh bruidhinn a-mach an aghaidh saoradh Mhegrahi.

Agus, thuirt e nach robh an aire air a' cheist as cudromaiche nuair a bha iad a' smaoineachadh air a' chùis seo.

Sin, am bu chòir dhaibh taic a thoirt do shaoradh an aon duine a dhìteadh airson na h-ionnsaigh ann an Locarbaidh?

Tha na pàipearan a chaidh fhoillseachadh an-diugh a' sealtainn gun robh dragh air Riaghaltas Bhreatainn mu na thacradh nam bàsaicheadh al-Megrahi ann am prìosan Albannach.

Cha robh Dàibhidh Camshron a' stiùireadh an riaghaltais aig an àm seo.

Ach nan robh, am biodh e deònach a chluaisean a dhùnadh ris a' chomhairle sin agus iarraidh air an riaghaltas Albannach Megrahi a chumail an grèim?

Cealgearachd

Thuirt Ailig Salmond gun robh Riaghaltas na h-Alba gu ìre mhath toilichte leis na chaidh fhoillseachadh an-diugh.

Tha Mgr Salmond agus an SNP air prìs phoileataigeach a phàigheadh airson saoradh Mhegrahi mar-thà agus chì sinn a dh'aithghearr an toir sin buaidh orra aig an taghadh Albannach.

Ach, an-diugh, chuir e air na Làbaraich ann an Alba gun robh iad ri cealgaireachd air a' chùis.

Thug iad slaic mhòr air an SNP airson saoradh Mhegrahi aig an àm - ach an-diugh thàinig an dearbhadh gun robh Riaghaltas Ghòrdan airson a h-uile càil a dhèanamh cinnteach gun tacradh sin.

Anns an eadar-ama, tha bomaire Locarbaidh fhathast beò ann an Tripoli.

Thuirt am prìomhaire nach biodh rannsachadh ùr an-diugh. Ach cha tig am facal mu dheireadh cho fada a mhaireas Megrahi fhèin.

• Comharraich le
• |
• |
• |
• |
• - Dè tha seo?