Lle i wella nid i walla
Am wythnosau lawer yn y Saithdegau bu papur newydd lleol y Caernarvon and Denbigh Herald yn hysbysebu 'Tomato pants' ar werth.
Gwell peidio a sôn beth alwodd Y Cymro gwmni drama Arad Goch un wythnos flynyddoedd yn ôl bellach ond doedd wnelo fo ddim a lliw yr arad!
Ac mewn papur lleol saesneg yn y gogledd ddwyrain gwelwyd siop yn estyn "Croeso Cynnes i Barot" yn hytrach nag i bawb.
Do, dros y blynyddoedd bu Diawl y Wasg yn elyn llawer rhy hawdd i'w gael mewn cyfyngder.
Ac mae'n ymddangos ei fod yn dal ar waith fel y dengys y cywiriad difyr hwn yn un o bapurau bro Ynys Môn:
Gwaith y Diafol
Bu diafol y Wasg yn hynod o brysur yn crwydro tudalennau rhifyn Mehefin o'r Rhwyd. Gadawodd ei ôl ar sawl erthygl ac adroddiad heb i neb ei ddal dan y chwydd wydr.
Ymddiheurwn am sawl gwall gan gydnabod bod lle i wella ond nid i 'walla'.
Siom (a sioc) oedd canfod y penawd anghywir uwchben ail ran o stori Ann Wyn Owen ... 'Y Gusan Hallt', parhad o'r bennod gyntaf a argraffwyd yn rhifyn Mai oedd hon, ac er bod cysylltiad a'r 'Blethen Aur', o dan y teitl 'Y Gusan Hallt' yr ymddangosodd y rhan gyntaf o'r stori.
Diolch byth na chafodd y camgymeriad unrhyw effaith ar y mwynhad â'r pleser o ddarllen stori arbennig iawn. Beth ddywedai? 'Sorri Miss' ddigwyddith o ddim eto . . . ymddiheuriadau didwyll iawn.
A mae yna fwy! . . . pwysodd awdur 'Byd Natur' fotwm y cyfrifiadur yn frysiog a ffwrdd a'r copi drafft i Langefni, G. O. Parry'n teimlo'r gwres hefyd . . . gweler y rhan olaf o'r copi cyflawn ar dud ....
Yng ngholofn W R Owen mae cyfeiriad at Gapel Salem (A), Bryngwran, fel addoldy wedi cau. Camddealltwriaeth ddigwyddodd, mae oedfa yn Salem yn achlysurol a diolch i Mr Harri Roberts am hynny, y fo sy'n cadw'r drws ar agor; bydd W R yn falch iawn o glywed.
Wel, dyna ni, daw Mehefin ddim am flwyddyn arall, gobeithio bod yr hen ddiafol wedi gwneud i waetha am sbel!. Peidiwch a bod yn or-feirniadol, cofiwch mae gwirfoddolwyr dygn sydd yn yr afael a'r Papur Bro.
Ella nad oes lle i walla, ond mae eu cywiro yn medru bod yn destun cryn ddifyrrwch. Hei lwc y y bydd gwallau'r dyfodol yn cael eu dal cyn iddyn nhw ymddangos yn rhwyd y golygydd.
