Arwyddion hwyl
Mae'r wobr am yr arwydd cyntaf o Eisteddfod yr Urdd 2010 yn mynd i Dalybont rai milltiroedd i'r gogledd o Aberystwyth.
Yno y gwelais faneri coch gwyn a gwyrdd gyntaf a symbolau'r Urdd ar ochr y ffordd.
Mae yna gwyno wedi bod yn y gorffennol nad yw'r baneri a'r trimins mor amlwg ag y gallen nhw fod - doedd yna nemor ddim y llynedd yng Nghaerdydd i nodi bod "gŵyl ieuenctid fwyaf Ewrop" yn cael ei chynnal yn y Brifddinas.
Er ei bod yn denau o gwmpas Aberystwyth ni all neb feirniadu'r Cardis o ddiffyg brwdfrydedd banerog ac ar fryn uwchlaw maes y Steddfod mae rhywun wedi gosod neges glir hefyd.
Hanner dydd bnawn Sadwrn ac mae rhywun yn teimlo'n Steddfodol yn barod.
Ond heb ddechrau canu cân Mr Urdd hyd yn hyn.
Fory falle . . .
