Â鶹ԼÅÄ

An-diugh, fios mun obair leantainneach a tha Coimisean Uaighean Cogaidh a' Cho-fhlaitheis a’ dèanamh. Tha uallach orra airson còrr agus millean clach-uaighe agus carragh-cuimhne ann an 154 dùthaich air feadh an t-saoghail. Tha còrr agus 13,000 làrach anns an Rìoghachd Aonaichte a-mhàin. Innsidh Dòmhnall Màrtainn mu eachdraidh a' Choimisein agus na h-àitichean eadar-dhealaichte far a bheil uaighean rin lorg.

Chaidh claidheamh a bhuineadh do fhear aig a bheil inbhe sònraichte ann an dualchas Sheanagal a thilleadh dhan dùthaich às dèidh iomadach bliadhna anns an Fhraing. B' e Omar Saidou Tall fìor ghaisgeach do mhuinntir na dùthcha air sgàth ’s na rinn e airson saorsa a ghlèidheadh dha Seanagal bho na Frangaich anns an 19mh linn. Chan eil an seo ach toiseach-tòiseachaidh iomairt far an tèid stòras eachdraidheil a thilleadh gu dùthchannan thaobh siar Afraga às na taighean-tasgaidh Frangach. Cluinnidh sinn mu bheatha Omar Saidou Tall bho Calum Iain Bartlett.

Cuideachd, tha Maureen NicLeòid a' leantainn oirre le a cuairt sìos a’ Nile airson cuid de na cànain a th’ air am bruidhinn air bràighean na h-aibhne a chluinntinn. An-diugh tha i ag innse mu thri cànain Sudan.

Agus thèid sinn dhan tasglann airson èisteachd ri còmhradh mu uchd-mhacachd. Bhruidhinn Coinneach ri Gladys Nic Iain ann an 2005 's i ag innse a sgeulachd-beatha, sgeulachd a chum i fo rùn airson grunn bhliadhnaichean.

coinneach@bbc.co.uk