Â鶹ԼÅÄ

Alasdair,

Duilich gun tug e cho fada dhomh an litir seo a sgrìobhadh. Chan eil fhios agam dè as urrainn dhomh a ràdh riut. Dè a bhios tu airson a chluinntinn? Tha a h-uile duine ag ràdh gum bu chòir dhomh rudeigin a sgrìobhadh thugad co-dhiù, ach tha e air a bhith gu math doirbh, dìreach suidhe sìos agus sin a dhèanamh. 

Bha mi a’ tadhal air d’ athair agus do mhàthair an latha eile. Tha iad ceart gu leòr, ach tha mi a’ smaoineachadh gu bheil an t-uallach a’ toirt buaidh mhòr air do mhàthair. ’S cinnteach gu bheil e duilich dhi, ’s Eàirdsaidh ‘s tu fhèin air falbh agus chan eil sinn air guth a chluinntinn, ach tha sinn uile an dòchas agus ag ùrnaigh gu bheil sibh slàn fallain. Sibh fhèin agus a h-uile duin’ eile bhon sgìre a dh’fhalbh cuideachd. Tha Marion, piuthar do mhàthar, air a bhith gu math meadhanach, ach tha mi a’ smaoineachadh gu bheil piseach air a thighinn oirre. Tha mi an dòchas gun tug e toileachas dha do phàrantan gun do thadhail mi a-staigh. Feumaidh mi a dhol ann a-rithist a dh’aithghearr. Bha d’ athair san àbhaist, a’ magadh orm gun sguir, ach chan eil an aon seòrsa cleas a’ dol san àite idir. 

Cha do chuir mi orm an fhàinne a thug thu dhomh fhathast. Chan eil fios agam carson, ach tha mi a’ faireachdainn gu bheil e nas sàbhailte fuireach gus an till thu fhèin dhachaigh. Agus dè a thachras mur nach till thu? Tha fios agam gum bu chòir dhomh a bhith dòchasach ach feumaidh sinn a bhith ciallach mun chùis. ’S dòcha nuair a thilleas tu nach bi thu airson mo phòsadh co-dhiù. Chan eil fhios againn cuin a tha an cogadh seo a’ dol a sguir. B’ fheàrr leam gu robh agus gum b’urrainn dhomh a ràdh riut san litir seo gum bi thu dhachaigh an ceartuair. 'S chan eil mi idir ag ràdh nach eil mi airson fuireach riut idir, ach tha e doirbh a bhith seo as d’ aonais. Tha mi cinnteach gu bheil cùisean gu math nas miosa dhuibhse an sin. Chan eil sinne a’ cluinntinn mòran ach na droch naidheachdan. Fhuair Màiri Sìne an ath dhoras telegram an-dè mu Iain. Tha e dìreach uabhasach. 

Bha againn ris a’ bheat fhaighinn an-dè. Bha trioblaidean aig Daisy bhochd agus tha fios agad fhèin nach eil mise gu mòran feum aig na h-amannan a tha sin. ’S e Calum againne as fheàrr air a’ chroit. Tha mo mhàthair an-còmhnaidh ag ràdh, O thasgaidh, chan urrainn dhut a bhith math air a h-uile càil ach tha thu dèanamh do dhìcheall. Tha tòrr agam ri ionnsachadh fhathast ge-tà agus b’ fheàrr leam gu robh mi air barrachd ùidh a ghabhail nuair a bha mi a’ fàs suas ach chan eil adhbhar dhuinn a bhith smaoineachadh mar sin an-dràsta. Feumaidh sinn dìreach cumail a’ dol agus sinn beò an dòchas gun tig crìoch air an sgrios a tha seo ann an ùine gun a bhith fada.

Co-dhiù, tha mi a’ smaoineachadh gum fàg mi aig an sin e agus gun till thu fhèin agus a h-uile duine eile air ais slàn, sàbhailte a dh’aithghearr. ’S ann an uair sin a smaoinicheas sinn air pòsadh agus chan ann an-dràsta. Cha leig an t-eagal leam smaoineachadh mu dheidhinn an-dràsta co-dhiù. Ach na dìochuimhnich gu bheil gaol agam ort, agus bidh gu bràth.

Marsaili