Â鶹ԼÅÄ

Mae Ysgrifennydd Materion Gwledig Cymru wedi dweud ei bod yn bwysig rhoi penderfyniadau'n ymwneud â'r diciâu mewn gwartheg yn nwylo ffermwyr.

Roedd Huw Irranca-Davies, sydd hefyd bellach yn ddirprwy brif weinidog, yn siarad ar raglen Dros Frecwast o Sioe Amaethyddol Ynys Môn ddydd Mawrth.

Roedd eisoes wedi dweud ei fod yn sefydlu bwrdd penodol i geisio diddymu'r clefyd yng Nghymru.

Yn ei gyfweliad Cymraeg cyntaf ers ei benodiad yn ddirprwy brif weinidog, pwysleisiodd hefyd bwysigrwydd cael atebion penodol i'r sefyllfa yng Nghymru.

Dywedodd: "Dwi 'di bod yn cwrdd â ffermwyr a milfeddygon a'r diwydiant ac wedi gwrando ar y pryderon TB.

"Felly rydw i'n cydnabod yr effaith ar ffermwyr, eu teuluoedd a'r busnesau.

"Mae'n rhaid nawr i'r bwrdd fynd ymlaen gyda rhaglen o waith er mwyn i ni waredu TB yng Nghymru.

"Mae grŵp cynghori technegol wedi dweud bod bywyd gwyllt yn rhywbeth i edrych arno, felly bydd y bwrdd yn ystyried unrhyw gyngor gan y grŵp cynghori technegol ac yn cyflwyno cyngor i fi hefyd."

Fe'i holwyd ymhellach am y gwahaniaethau rhwng dull Cymru a Lloegr o fynd i'r afael â'r clefyd.

Atebodd: "Byddwn ni yn mynd ymlaen yng Nghymru gyda rhaglen gwaredu TB yn ffocysu ar y problemau yng Nghymru, nid yn Lloegr.

"Rydyn ni yn gwneud llawer o bethau diddorol a phethe effeithiol yng Nghymru.

"[Rhaid] rhoi decisions o ran TB i'r ffermwr ei hun - mae'n bwysig i ddweud bod rhaid ni fynd ymlaen yng Nghymru gyda'r solutions yng Nghymru, yn specific i Gymru."

Gofynnwyd iddo hefyd pa mor ymarferol oedd gwneud y ddwy swydd, sef Dirprwy Brif Weinidog ac Ysgrifennydd Newid Hinsawdd a Materion Gwledig.

"Wel, rydw i'n edrych ymlaen at wneud y ddwy swydd," meddai.

"Yn effeithiol, does dim byd yn newid - dwi yma heddiw nawr yn y Sioe ar Ynys Môn yn edrych ymlaen at gerdded y maes yn siarad â ffermwyr a llawer o bobl eraill.

"Ond does dim byd yn newid - dwi yn cadw ymlaen i siarad gyda'r gymuned ffermio, grwpiau amgylcheddol, gyda sefydliadau newid hinsawdd, a'r sefydliadau bio amrywiaeth.

"Mae'r gwaith yn mynd yn ei flaen."