Â鶹ԼÅÄ

Mae cynlluniau ar gyfer tram newydd - a allai ymestyn ar draws Caerdydd gyfan yn y pen draw - wedi cael eu datgelu.

Y gobaith yw y bydd cam cyntaf Cledrau Croesi Caerdydd, sy'n cysylltu gorsaf ganolog y ddinas â'r Bae, wedi'i gwblhau erbyn dechrau 2029.

Dywedodd Cyngor Caerdydd, sy'n gweithio gyda Thrafnidiaeth Cymru i adeiladu'r dramffordd, y byddai'r Cledrau Croesi yn y pen draw yn cysylltu "rhai o gymunedau mwyaf difreintiedig" y ddinas â'r rhwydwaith rheilffyrdd.

Mae pobl yn cael eu hannog i rannu eu barn ar y cynlluniau fel rhan o , sy'n rhedeg tan ddiwedd mis Hydref.

Hyd yn hyn, dim ond cam cyntaf Cledrau Croesi sydd wedi sicrhau cyllid, sy’n cysylltu gorsaf Caerdydd Canolog â Bae Caerdydd ar y trên am y tro cyntaf.

Bydd hyn yn golygu adeiladu dau blatfform newydd yng nghefn maes parcio Caerdydd Canolog, gorsaf brysuraf Cymru.

Mae £100m wedi'i godi i gefnogi'r cam cyntaf, gan gynnwys £50m o Gronfa Codi'r Gwastad (Levelling Up Fund) Llywodraeth y DU a £50m gan Lywodraeth Cymru.

Nid yw cost y prosiect Cledrau Croesi llawn yn glir, er yn 2019 cyfeiriodd cyngor y ddinas at gynlluniau fel "gweledigaeth trafnidiaeth gwerth £1bn".

Y gobaith yw y bydd y gwaith o adeiladu’r cam cyntaf yn dechrau yn hydref 2025 ac mae datblygwyr yn gobeithio cael yr adran honno ar waith erbyn diwedd 2028 neu ddechrau 2029.

Nid oes amserlen ar gyfer y prosiect Cledrau Croesi ehangach.