�鶹Լ��

Diffyg hunan-hyder sy’n rhwystro‘r rhan fwyaf o bobl rhag trawsnewid eu bywydau efo ymarfer corff, yn ôl yr hyfforddwr personol Cadi Fôn.

Mae’r fam 39 oed o Gaernarfon yn mynd i fod yn arbenigwr ffitrwydd ar gyfres trawsnewid iechyd newydd ar S4C o’r enw Tŷ FFIT, lle fydd hi’n rhannu ei 20 mlynedd o brofiad yn helpu pobl fel hyfforddwraig personol.

Meddai mewn cyfweliad gyda Cymru Fyw: “Diffyg hyder ydy’r rhwystr pennaf. Mae pobl yn meddwl bod nhw'n methu 'neud o, ddim yn gwybod beth i 'neud, wedi cael profiad drwg yn yr ysgol efo ymarfer corff.

“Dwi’n meddwl fod lot o bobl yn rhoi barriers i’w hunain achos fod gynno nhw ddim yr hyder. Dwi’n gwybod bod o’n costio pres i gael hyfforddwr personol ond mae’n gwneud lles i gael rhyw fath o arweiniad os da chi’n teimlo bod chi ddim yn gwybod beth i wneud neu’n ansicr.”

Ynghyd â’r maethegydd Angharad Griffiths, rôl Cadi yn y gyfres deledu newydd fydd hyrwyddo ffyrdd iachach o fyw ac arferion bwyta gwell ar gyfer y pum unigolyn sy’n cymryd rhan.

Meddai Cadi, sy’n rhedeg stiwdio ffitrwydd Braf yn Ninas Dinlle: “Mae'n deimlad cyffrous iawn - mae o'n bob dim dwi’n goelio ynddo a bob dim dwi’n trio rhoi drosodd yn y sesiynau dwi’n 'neud fel rheol so mae'n grêt cael gwneud i gynulleidfa mwy.

“Y peth pwysigaf dwi’n dweud yn fy sesiynau ydy ‘da ni’n rhoi'r wybodaeth a’r sgiliau a trio ffeindio allan beth mae pobl yn fwynhau so mae pobl yn gallu cael bywydau mwy actif.

“’Da ni’n rhoi'r sail a nhw sy’n cario ymlaen. Dydy o ddim am weiddi ar bobl a dweud wrthyn nhw be’ i 'neud – mae o am roi y profiad a’r wybodaeth i nhw gael beth maen nhw isho allan ohono fo a 'neud o’n rhywbeth maen nhw’n mwynhau.

“Dyna sy’ bwysicaf – os ydy rhywun yn mwynhau bod yn actif a’r math o ymarfer corff maen nhw’n 'neud, mae’n nhw’n mynd i gario mlaen i 'neud o.”

Newid

Bydd Cadi a’r arbenigwyr eraill yn cydweithio gyda’r pum unigolyn er mwyn adeiladu patrwm o arferion da, fel mae’n esbonio: “Y prif beth ydy profiad positif a selio arferion da.

“Mae o’n broses graddol. ‘Da ni’n dechrau efo techneg ymarferion, gofyn i nhw 'neud ychydig bach o bethau maen nhw’n enjoio - falle mynd am dro neu ddosbarth ioga.

“Mae 'na ran mawr yn mynd i fod yn ymarferion bach fedrith pobl 'neud bob diwrnod fel mynd allan i’r awyr agored, yfed mwy o ddŵr.

"Da ni’n 'neud o mewn ffurf habit stacking felly un ar y tro nes bod toolbox o habits sy’n ran o dy ddiwrnod di. Dyna ydy’r peth pwysica’, bod o’n doable a’n gweithio o gwmpas bywydau pobl ac yn dod yn ran naturiol o fywyd.

“Mae bron fel yswiriant i’r dyfodol achos mae gymaint o bobl yn meddwl, dwi’n safio pres at fy mhensiwn. Dwi’n gweld symud a iechyd mor bwysig â hynny achos beth yw’r pwynt cael pres yn y banc os chi isho mynd i chwarae golff ond methu mynd i chwarae golff? Neu os 'da chi isho mynd i drafeilio ond methu mynd i drafeilio a’n mynd allan o wynt pan chi'n cerdded?

“Mae gofalu ar ôl eich iechyd yn bwysicach na’r ochr pres o ran meddwl am y dyfodol.”

Amser

Mae Cadi’n gweithio efo nifer o gleientiaid fel rhan o’i gwaith bob dydd ac yn credu’n gryf fod prysurdeb bywyd yn cael effaith wael ar iechyd pobl: “Beth dwi’n weld ydy bod pobl yn rhy brysur, ddim yn gwneud amser iawn ac yn bwyta ar y go.

“Ac mae lot o bobl dwi’n gweithio efo wedi tyfu fyny yn diet culture yr 1980au a’r 1990au lle mae pwysau mawr ar deiet a bod yn strict, cyfri calorïau.

“Mae’n anodd iawn cael allan o hwnna, mae’n cymryd lot o waith. Mae cymaint o bobl yn dweud 'dwi wedi cael donut neithiwr a bydd rhaid i fi weithio’n galed rŵan' a bod yn rili cas efo’u hunain.”

Y trawsnewidiadau mwyaf dramatig mae Cadi wedi gweld yn ei gyrfa yw mewn merched hŷn sydd ddim wedi codi pwysau o’r blaen: “Mae gweld bod nhw’n gallu codi pwysau a bod codi pwysau ddim yn rhywbeth scary na drwg sy’n mynd i 'neud i ti gael muscles mawr. Dyna oedd y meddylfryd ers talwm.

“Mae’n sioc – maen nhw’n meddwl na fyddan nhw’n mwynhau codi pwysau trwm ond maen nhw’n dda ynddo fo ac maen nhw’n cryfhau.

“Hynna ydy’r trawsnewid mwyaf, o ran meddylfryd yn hytrach na’r corff. Os ti’n cael hynna a ti wedi cael rhywbeth maen nhw’n mynd i 'neud a chario mlaen, yna mae’r trawsnewid corff a cholli pwysau yn byproduct o hynna. Ond ddim hynna ydy’r gôl.”

Mae Cadi wrth ei bodd yn gweld pobl yn trawsnewid eu bywydau: “Dwi’n teimlo’n lwcus iawn – mae’n deimlad mor dda pan ti’n gweld rhywun yn ffeindio rhywbeth maen nhw’n mwynhau 'neud ac dwi’n gwybod fod y person 'na’n mynd i fod yn fwy actif a’n hapusach.

“Rhoi'r hwb ydw i mwy na dim byd – nhw sy’n 'neud y gwaith a bod nhw’n gweld fi fel rhywun i guidio yn hytrach na deud wrthyn nhw be' i wneud.”

Cyngor Cadi

Bydd Tŷ FFIT yn cychwyn ffilmio ym mis Medi.