Â鶹ԼÅÄ

Mae angen cymdeithas fwy hael ar gyfer yr heriau sy'n wynebu Cymru a'r DU heddiw, meddai arweinydd Democratiaid Rhyddfrydol Cymru wrth aelodau'r blaid.

Mae Jane Dodds yn dweud bod y Democratiaid Rhyddfrydol yn cynnig "gweledigaeth hael ar gyfer ein gwlad".

Dyma'r dewis arall yn lle "dinistr difeddwl" y Ceidwadwyr, "rheolwriaeth" Llafur ac "atebion gwag, poblogaidd" Plaid Cymru, meddai Ms Dodds.

Fe siaradodd ddydd Sadwrn ar ddiwrnod cyntaf cynhadledd ddeuddydd Democratiaid Rhyddfrydol Cymru, gafodd ei chynnal yn Abertawe.

Gan addo y bydd y Democratiaid Rhyddfrydol yn chwarae eu rhan i gael gwared ar bob AS Ceidwadol o Gymru yn etholiad cyffredinol y DU a ddisgwylir y flwyddyn nesaf, dywedodd Ms Dodds ei bod yn falch bod ei phlaid "yn gwneud yr achos dros gysylltiadau cryfach ag Ewrop, ail-ymuno â'r farchnad sengl, ac undeb tollau".

Fe wnaeth ddadlau bod angen hyn er mwyn "dadebru ein heconomi ac amddiffyn ein rhyddid", a helpu i adeiladu "gwladwriaeth les hael fel rhan hanfodol o greu dyfodol tecach i bob un ohonom".

Dywedodd Ms Dodds wrth y gynhadledd fod gweinidogion Ceidwadol y DU yn "gyrru ein gwlad i'r ddaear", "yn pardduo'r rhai mwyaf bregus, yn chwalu ein gwasanaethau cyhoeddus, ac yn chwalu ein heconomi".

Ond fe wnaeth hefyd ymosod ar y wleidyddiaeth ym Mae Caerdydd, gan ddweud ei bod hi "mor rhwystredig pan mae'n teimlo fel ein bod ni'n fodlon yng Nghymru i gymryd camau bach iawn fesul tipyn.

"Chwarae gemau pan mae pobl yn aros blynyddoedd am driniaeth iechyd, mae plant a phobl ifanc yn dihoeni ar restrau aros iechyd meddwl, ac mae deintyddiaeth y GIG mewn argyfwng."

Ymhlith y dadleuon yn y gynhadledd dros y penwythnos mae cynigion ar greu "pwerdy Môr Celtaidd", sefydlu gweithrediaeth GIG annibynnol i arwain y gwasanaeth iechyd yng Nghymru, a symud i wythnos waith pedwar diwrnod.

Ms Dodds yw'r unig Ddemocrat Rhyddfrydol ymhlith 60 aelod Senedd Cymru, a does gan y blaid ddim ASau yn San Steffan.

Cafodd y blaid enillion sylweddol ym Mhowys yn etholiadau lleol y llynedd, gan ddod y blaid fwyaf ac arwain y cyngor - a oedd yn cael ei arwain yn annibynnol yn flaenorol - trwy ymuno â chynghorwyr Llafur i ffurfio cabinet.

Yn Etholiad Cyffredinol 2019 daeth y Democratiaid Rhyddfrydol yn ail i'r Ceidwadwyr yn seddi Powys, sef Brycheiniog a Sir Faesyfed, a Sir Drefaldwyn.

Mae disgwyl i arweinydd y Democratiaid Rhyddfrydol yn y DU, Ed Davey hefyd annerch y gynhadledd ddydd Sadwrn.