Â鶹ԼÅÄ

Ar drothwy gwyliau'r haf mae 'na bryder am y pwysau ychwanegol ar y gwasanaeth ambiwlans yn ne Gwynedd.

Mae poblogaeth yr ardal wledig yn chwyddo dros yr haf, gyda miloedd o ymwelwyr yn heidio yno.

Mae llawer o'r canolfannau poblogaidd dros awr i ffwrdd o'r prif ysbytai.

Dywedodd Aelod o'r Senedd Plaid Cymru ar gyfer Dwyfor Meirionnydd, Mabon ap Gwynfor ei fod yn poeni am y sefyllfa, gan ddweud bod ambiwlansys Meirionnydd yn cael eu tynnu o'r ardal.

"'Dan ni gyd yn gwybod am ambiwlansys yn gorfod ciwio tu allan i ysbytai fel Maelor a Glan Clwyd yn aros i'w cleifion gael mynediad i'r ysbyty," meddai.

"A'r hyn sy'n digwydd ydy bod ambiwlansys o Feirionnydd yn gorfod teithio ymhellach i ogledd-ddwyrain Cymru i ymateb i ddigwyddiadau.

"Mae hyn yn arbennig o bryderus yr adeg yma o'r flwyddyn oherwydd bod cyfnod yr haf yn dod â phwysau ychwanegol ar y gwasanaeth iechyd wrth fod mwy o bobl yn ymweld â'r ardal.

"'Dan ni angen sicrwydd y bydd y Gwasanaeth Ambiwlans yna i ymateb i unrhyw un fydd eu hangen."

Ychwanegodd Mr ap Gwynfor bod pryderon hefyd am lefelau staffio.

"Mae'n fwy hefyd na daearyddiaeth - rydw i wedi anfon cwestiwn at yr Ymddiriedolaeth Ambiwlans yn gofyn am atebion ynglŷn â gweinyddiaeth a sicrwydd am nifer y staff," meddai ar Dros Frecwast.

"Mae'n rhaid sicrhau bod yna ddigon o barafeddygon ar gael i sicrhau oriau'r canolfannau ambiwlans, am fod rhai'n cau'n gynnar a methu â gweinyddu'r ardaloedd hyn.

"Ac mae'r galw yn llawer mwy yr adeg hon o'r flwyddyn ​am fod nifer mwy o bobl yn ymweld â'r ardal."

Ond dywedodd Lee Brookes, cyfarwyddwr gweithrediadau Gwasanaeth Ambiwlans Cymru bod "natur gwaith ambiwlans yn golygu bod criwiau yn aml yn mynd i ddigwyddiadau tros ffiniau sirol os mai nhw ydy'r agosaf".

"Mae hyn yn arbennig o wir yn ardaloedd gwledig gogledd a chanolbarth Cymru, lle mae criwiau yn teithio y tu allan i ardal i fynd â chleifion i'r ysbyty.

"Ond ma' gorfod aros i drosglwyddo claf i ysbyty yn golygu nad ydy criwiau wastad ar gael i ymateb i alwadau 999 eraill, a 'dan ni yn parhau i gydweithio efo byrddau Iechyd i geisio datrys hyn.

"Mae yna adolygiad ar hyn o bryd, sy'n cynnwys Gwynedd, fel y gallwn ni fod yn hyderus bod ganddon ni'r niferoedd o adnoddau yn y llefydd iawn ar yr adeg iawn."

Ychwanegodd bod y gwasanaeth yn "parhau i recriwtio ar gyfer ein rheng flaen sy'n golygu, ynghyd â'r llynedd, ein bod ni wedi denu 250 o bobl i'r gwasanaeth".