Â鶹ԼÅÄ

Mae teyrngedau wedi eu rhoi i ddyn a fu farw ar ôl iddo syrthio i afon yn Abergwyngregyn, Gwynedd.

Bu farw Alun Owen, sy'n cael ei adnabod yn lleol fel Al Bonc, 32 oed, wrth weithio fel peiriannydd i Openreach ar 6 Hydref.

Dywedodd y teulu bod "dim geiriau i ddisgrifio'r boen o golli Al", a'u bod nhw'n "hollol dorcalonnus, a'n brwydro i geisio gwneud synnwyr o ddigwyddiadau trasig y diwrnod yna".

Mewn datganiad dywedodd y teulu bod "ganddo'r gallu i oleuo hyd yn oed y dyddiau tywyllaf ac mae 'na fwlch enfawr yn ein bywydau hebddo".

Roedd Mr Owen yn ŵr ac yn dad i ddwy ferch ifanc.

Dywedodd y teulu bod "pawb oedd yn ddigon ffodus i'w nabod yn fuan yn dod i feddwl amdano fel cymeriad llawn bywyd" a llawn hiwmor.

Ychwanegodd y teulu eu bod nhw am ddiolch i bawb am yr holl gefnogaeth ac i'r gwasanaethau argyfwng.

Mae teyrngedau lleol hefyd wedi eu rhoi gan glybiau chwaraeon lleol yr ardal.

Ar Twitter, dywedodd Clwb Rygbi Bethesda: "Mewn galar dwys yr ydym ni fel teulu CR Bethesda yn cydymdeimlo o waelod calon gyda theulu Al (Bonc).

"All geiriau fyth wir gyfleu ein dychryn a'n tristwch o golli aelod mor weithgar ac annwyl ond nid yw'n colled ni yn ddim o'i gymharu â cholled ei deulu."

Dywedodd Clwb Criced Bethesda: "Cydymdeimlwn yn ddwys fel clwb gyda theulu Alun 'Bonc' Owen yn dilyn y ddamwain dorcalonnus yr wythnos hon.

"Ergyd enfawr i'r teulu a'r ardal gyfan."

Ers marwolaeth Mr Owen, mae tudalen Go Fund Me wedi casglu dros £43,000 ar gyfer y teulu.