Â鶹ԼÅÄ

Mae llefarydd ar ran sioe amaethyddol Penfro wedi cadarnhau fod pum person wedi'u cludo i'r ysbyty yn dilyn digwyddiad gyda 'cheffyl gwyllt' ddydd Mercher.

Fe gafodd y person oedd yn marchogaeth y ceffyl ar y pryd ei daflu oddi ar ei gefn, cyn i'r ceffyl neidio dros ffens i ganol y dorf.

Cafodd wyth person eu hanafu.

Ymhlith y pump sydd wedi'u cludo i'r ysbyty mae bachgen 12 oed a dyn 83 oed.

Dywedodd y trefnwyr nad oedd yr anafiadau yn rhai difrifol iawn, ac ychwanegodd Cadeirydd y sioe, Mike Davies, fod "meddyliau pawb gyda'r rhai sydd wedi'u hanafu."

'Rhedeg yn wyllt'

Yn ôl llygaid dystion, fe garlamodd y ceffyl drwy faes y sioe ar ôl llwyddo i ddianc o'r ardal lle oedd yn cael ei ddal.

Roedd Ambiwlans Awyr ar y safle yn cynorthwyo gweddill y gwasanaethau brys.

Dywedodd Jonathan Twigg oedd yn sefyll ychydig droedfeddi i ffwrdd: "Fe dorrodd y ceffyl yn rhydd o'r ardal lle roedd yn cael ei ddal cyn dechrau rhedeg yn wyllt.

"Roedd yn rhedeg drwy'r dorf ac fe darodd tua chwe pherson allan o'r ffordd. Mae'n ymddangos fod sawl un yn cael triniaeth i anafiadau i'w pen gan swyddogion meddygol," meddai.

Dywedodd llygad dyst arall: "Clywais stiward yn gweiddi a rhedeg drwyddo, yn rhedeg drwy'r cylch.

"Aeth y ceffyl mas o'r cylch, pobl yn trio'i atal. Rhedodd drwy'r ffens, trwy'r dorf, trwy'r stondinau a'r stondinwyr.

Yn ôl y newyddiadurwraig Anwen Francis, oedd yno ar y pryd, fe ymatebodd trefnwyr y sioe yn syth wedi i'r ceffyl dorri'n rhydd.

"Fe nethon nhw bopeth oedden nhw'n fod i'w wneud. Nethon nhw stopio'r cystadlu yn y cylch yn syth, a galw am barafeddygon ac ambiwlans.

"Dwi di bod yn dangos ceffylau ers 35 o flynyddoedd a dwi ddim wedi gweld dim byd fel hyn erioed o'r blaen," meddai.

'Diolch'

Ychwanegodd Mr Davies: "Hoffem ddiolch i'r gwasanaethau brys lwyddodd i gyrraedd y safle'n sydyn a chynorthwyo'r rhai a gafodd eu hanafu.

"Bydd adolygiad llawn yn cael ei gynnal i'r amgylchiadau," meddai.

Bydd y sioe yn parhau fel yr arfer ddydd Iau.