Â鶹ԼÅÄ

Sioe Nefyn yw sioe amaethyddol gynta'r tymor ac eleni bydd llai o ddefaid a gwartheg yn cystadlu oherwydd y gaeaf caled.

Dywedodd Eirian Lloyd Hughes, ysgrifennydd y sioe, ei bod yn teimlo "bod llai o stoc wedi'u cofrestru eleni am fod tywydd gwael y gaeaf wedi effeithio ar ffermwyr.

"Mae nifer wedi dweud wrthai nad yw eu stoc yn edrych yn ddigon da i ddod i'r sioe."

Er hynny dywedodd bod nifer y ceffylau sydd wedi'u cofrestru i gystadlu yn uchel ac mae'n ymddangos y bydd nifer o gŵn hefyd yn ymweld â'r sioe.

Ychwanegodd: "Mae'r cŵn yn cofrestru ar y diwrnod ac felly dyw'r nifer ddim gynnon ni ond mae'n ymddangos bod nifer am gystadlu."

Mae pwyllgor y sioe yn credu hefyd bod y ffliw adar wedi cael effaith ar nifer yr ieir.

"Dwi'n meddwl mai rwan da'n ni'n gweld canlyniadau'r ffliw adar," meddai Eirian, sy'n ysgrifennydd y sioe ers 1989.

"Bu'n rhaid cadw adar i mewn am gyfnod ac felly dwi'n meddwl bod y ffaith nad ydynt wedi bod allan yn effeithio ar y cystadlu yn y sioe."

Tan troad y ganrif arferid cynnal y sioe ar ddydd Llun y Pasg ond wedi i'r sioe gael ei chanslo yn ystod cyfnod clwy' y traed a'r genau penderfynwyd ei chynnal ar ddydd Llun cyntaf Mai.

"Mae'r cyfnod yma yn well," meddai Eirian Hughes, "mae hi'n brafiach ac mae'r cyfnod wyna i bob pwrpas ar ben."

Roedd yna ofnau y byddai'r rheolau cwarantin newydd yn effeithio ar nifer y cystadleuwyr ond dyw hynny ddim wedi cael effaith o gwbl am mai sioe Nefyn yw'r cyntaf o'r sioeau amaethyddol.

"Does 'na ddim sioeau eraill ar hyn o bryd na chwaith arwerthiannau o gwmpas dyddiad y sioe ac felly ry'n wedi bod yn hynod o lwcus," dywedodd Eirian.

Mae'r sioe, fel arfer, yn denu oddeutu pedair mil o bobl ac mae'r trefnwyr yn gobeithio am dyrfa debyg eleni gan fod y tywydd i fod yn braf.

"Dewch yn llu,"meddai Eirian, "mae 'na stondinau crefft, arwerthwyr peiriannau amaethyddol a ffair - rhywbeth i bawb."

Mae rhaglen Ifan Evans yn darlledu o'r sioe brynhawn Llun am 14:00