Weinstein 'wedi ceisio difetha gyrfa Ioan Gruffudd'

Ffynhonnell y llun, PA

Disgrifiad o'r llun, Fe wnaeth Ioan Gruffudd ac Alice Evans briodi yn 2007

Mae Alice Evans, gwraig yr actor Ioan Gruffudd, wedi awgrymu fod Harvey Weinstein wedi ceisio difetha'i gyrfa hi a'i gŵr wedi iddi hi ei wrthod.

Mewn erthygl yn y Daily Telegraph dywedodd fod y cynhyrchydd ffilm wedi gofyn iddi fynd i ystafell 'molchi gydag ef er mwyn iddo allu ei "chyffwrdd" a'i "chusanu".

Yn dilyn y digwyddiad "sinistr" dywedodd nad oedd hi "erioed wedi cael ei hystyried ar gyfer ffilm Weinstein eto, a wnaeth Ioan ddim chwaith".

Mae llefarydd ar ran Ioan Gruffudd wedi cael cais am sylw.

'Prawf Harvey'

Daw ei sylwadau yn sgil nifer o honiadau eraill o aflonyddwch rhyw yn erbyn Mr Weinstein, sydd wedi arwain at ymchwiliadau heddlu yn yr UDA a'r DU.

Mae llefarydd ar ran Mr Weinstein wedi gwadu unrhyw honiadau o gyffwrdd oedd ddim yn gydsyniol.

Dywedodd Ms Evans fod y digwyddiad gyda Mr Weinstein wedi digwydd mewn bar gwesty yn Cannes yn 2002, pan oedd hi yno i hyrwyddo ffilm.

Disgrifiad o'r llun, Mae Ioan Gruffudd wedi actio mewn ffilmiau fel Hornblower, Titanic, a Fantastic Four

Roedd Ioan Gruffudd wedi cynnal clyweliad i Mr Weinstein y diwrnod cynt, meddai, a phan wrthododd hi ei gynigon fe ddywedodd: "Gobeithio aiff popeth yn iawn gyda dy gariad di."

Yn noson ganlynol mae'n dweud iddi fynd draw at Mr Weinstein, cyn iddo droi a holi "pwy wyt ti?" a cherdded i ffwrdd.

Ers hynny, meddai, mae hi wedi teimlo fod "dim siawns o gwbl" y byddai hi'n cael rhan mewn rhai ffilmiau "oherwydd rydw i eisoes wedi methu 'prawf Harvey'".

Ychwanegodd na fyddai fyth yn gwybod a oedd hi wedi cael ei rhoi ar ryw fath o 'restr ddu' oherwydd hynny, a bod y digwyddiad "wedi fy effeithio am flynyddoedd".

Ddydd Mawrth fe drydarodd: "Mae unrhyw un yn y busnes sydd yn dweud nad oedden nhw'n gwybod am Harvey Weinstein yn dweud celwydd."