Â鶹ԼÅÄ

Efa Thomas yw enillydd cystadleuaeth celf Â鶹ԼÅÄ Cymru am drefnu arddangosfa yn Amgueddfa Cymru.

Roedd Efa, sy'n wreiddiol o Gricieth, a phedwar cystadleuydd arall ar gyfres deledu 'The Exhibitionists'.

Bu'n rhaid i'r cystadleuwyr ddewis eitemau o gasgliad yr amgueddfa a dysgu sut i'w harddangos.

Dyma'r tro cyntaf i'r amgueddfa roi mynediad i'w holl gasgliad o weithiau celf, gan gynnwys paentiadau, ffotograffau a cherameg i aelodau'r cyhoedd.

"Fe wnes i gymryd rhan yn 'The Exhibitionists' oherwydd dwi bob amser am roi cynnig ar bethau newydd," meddai Efa.

"Dwi'n meddwl ei bod hi'n wych bod yr Amgueddfa wedi rhoi cyfle i aelodau o'r cyhoedd.

"Dyma ein hamgueddfa genedlaethol ni ac mae'n perthyn i bob person yng Nghymru."

'Creadigrwydd'

Yn y rhaglen olaf a ddarlledwyd nos Fercher Gorffennaf 18 roedd Efa a Julia Manser o Abertawe, y ddwy yn rownd derfynol y gystadleuaeth, yn cynnal eu harddangosfeydd eu hunain.

Cafodd y ddwy gefnogaeth Osi Rhys Osmond, uwch-ddarlithydd celf ym Mhrifysgol Fetropolitan Abertawe, a Karen MacKinnon, curadur yn Oriel Gelf Glynn Vivian, Abertawe.

"Mae'r rhaglen, a'r mentoriaid, wedi hybu fy nghreadigrwydd ac wedi fy annog i weithio'n annibynnol a gwneud beth bynnag roeddwn i eisiau," meddai Efa.

"Dwi'n amau a fyddwn i fyth wedi gwneud unrhyw beth fel hyn heblaw am y rhaglen.

"Mae'n dangos ein bod ni i gyd yn gallu bod yn greadigol ac i gyd yn gallu curadu arddangosfeydd sy'n deilwng o gael eu dangos yn Amgueddfa Cymru gan fod gennym i gyd straeon i'w hadrodd."

Mae arddangosfa Efa yn Amgueddfa Cymru yng Nghaerdydd tan Awst 19.