Â鶹ԼÅÄ

Ac fel dilynwyr selog y band yma, rhaid dweud mai dyma un o'r perfformiadau gorau dwi wedi gweld gan Y Panics ers sbel. Dyw hyd yn oed absenoldeb Nia Medi (llais) ddim yn effeithio rhyw lawer, gyda Fflur Dafydd yn llawn digon abl i gynnal y sioe.

Set digon chilled yw hi ar y cyfan - ond mae dal yn llawn o'r hen ffefrynnau - Dyn Tywydd, Leicra Lan Lofft, Mr Bean, Ladies. Yng nghanol y set mae Fflur Dafydd yn cyfnewid y gitâr acwstig am yr allweddellau, a dyma yw uchafbwynt y set i mi.

Mae'n chwarae cân newydd acwstig - heb deitl - sydd wedi cael ei hysgrifennu ar y cyd gyda ffrind o'r Iwerddon (Gwyddelod yw hanner y gynulleidfa a dweud y gwir - lle mae'r bobl leol?), ac mae'n hollol wych. Cân yw hi am golli plentyndod, ac mae'n cael sylw y gynulleidfa i gyd yn syth - pawb ar goll yn ei melodi hyfryd, a phawb ar fîn cwympo i gysgu. Ond, mae'r Panics yn adnabod eu cynulleidfa yn dda, ac yn chwarae Elin Royles i ddilyn - can â fwy o fynd iddi i ddihuno pawb!

Ffefryn arall i bawb o'r Gorllewin yw Pobl Chips - cân am ferched siop sglodion Crisp & Fry yng Nghaerfyrddin - lle sy'n bererindod i drigolion y dre ar ôl noson allan! Mae'r gân Ladiesi orffen yn ysgogi rhai i ddawnsio (o'r diwedd!) - a'r band i'w gweld yn falch o'r cwmni!

Mae'r band i'w gweld yn datblygu yn dda ac mae'n heb bryd am albwm - dewch 'mlaen bois! Yn anffodus, does dim llawer o ddyddiadau wedi eu trefnu (eto!) ar gyfer gigs dros yr haf (gyda Betsan yn byw yn y Gogledd, mae'r band yn ei ffeindio'n anodd i gynnal ymarferion), felly peidiwch a'u colli nhw ar y nos Wener yn gig Cymdeithas yr Iaith yn yr Eisteddfod.