- Y Sêr: Steve Evets, Stephanie Bishop, John Henshaw ac Eric Cantona.
- Cyfarwyddo: Ken Loach.
- Sgwennu: Paul Laverty.
- Hyd: 116 munud
'Nid actor - ond Cantona'
Adolygiad Lowri Haf Cooke
Mae cynhyrchiad diweddara'r cyfarwyddwr Ken Loach yn dilyn hanes postmon o Fanceinion sy'n derbyn cynghorion bywyd gan ei arwr mawr, Eric Cantona.
Cawn ein cyflwyno i Eric Bishop (Steve Evets) - y postmon dan sylw- eiliadau'n unig cyn iddo gael damwain car ar ôl gweld Lily (Stephanie Bishop), y wraig wnaeth o ei gadael yn gwbl ddisymwth ddeng mlynedd ar hugain ynghynt.
Yn dilyn breakdown llwyr, mae'n dychwelyd i'r cartref mae'n ei rannu gyda'i ddau lysfab da-i-ddim, gan geisio dygymod â realiti bob dydd yn y swyddfa bost.
Ceisia'i gydweithwyr wneud popeth i'w helpu; dweud jôcs a chynnal sesiynau trafod gan ddilyn canllawiau Paul McKenna - ond ymddengys mai'r unig beth sy'n llwyddo i'w godi o'i iselder dwys yw cyfres o "ymddangosiadau" gan Eric Cantona yn ei stafell wely, diolch i fwg drwg y meibion.
Wynebu'r dyfodol
Dros yr wythnosau nesaf, datblyga Cantona yn gyfuniad o guru, hyfforddwr ffitrwydd ac athronydd ar lôg, gan fod o gymorth i'r dyn cyffredin wrth iddo orfod derbyn camgymeriadau'r gorffennol a wynebu penderfyniadau mawrion ar gyfer y dyfodol.
Daw Eric hefyd i ddeall bod teulu a ffrindiau yn hollbwysig wrth geisio darganfod ei hun unwaith eto.
Rhaid dweud imi gael fy hudo'n llwyr gan y ffilm hyfryd hon, diolch i berfformiadau naturiolaidd y cast Prydeinig, a phresenoldeb trydanol y seren o Ffrainc.
Ar y naill law, dyma deyrnged sinematig i un o bêl-droedwyr mwyaf talentog - a dadleuol- y Nawdegau, gan fod yma doreth o archif o gôliau gorau Cantona dros Gochion Manceinion, ynghyd â llwyfan amlwg i'w "ddoethinebau".
Ond mae Looking For Eric yn deyrnged i gefnogwyr go iawn y gêm sydd wedi profi chwyldro corfforaethol ers i Cantona adael y cae chwarae i ganolbwyntio ar waith actio, gydag Eric Bishop a'i ffrindiau yn enghreifftiau o ddilynwyr sy'n methu fforddio mynd i weld gemau'r tîm sy'n hawlio'u teyrngarwch.
Mae'n ddifyr nodi mai Cantona ei hun gynigodd y syniad am y ffilm i'r cyfarwyddwr Ken Loach, sydd fwyaf adnabyddus am ei ffilmiau realaeth cymdeithasol fel Kes (1969), a Raining Stones (1993).
Tynnu coes
Ond serch ei statws fel actor ac uwch gynhyrchydd gyda'r ffilm hon, mae'r Ffrancwr yn amlwg yn berffaith hapus i'r cynhyrchiad dynnu coes am ei ddelwedd - a'i ddywediadau - ac, os rhywbeth, canlyniad y dychanu ysgafn hwn yw dyrchafu ymhellach ei statws fel "flawed genius".
"I am not a man. . . I am Cantona," yw un o linellau mwyaf cofiadwy y cynhyrchiad, ond y wên gyfrwys ar wyneb y Ffrancwr sy'n dilyn hynny sydd yn achub y ffilm rhag syrthio i'r fagl o fod yn ego-trip.
