|
Cynhaliwyd yr arwerthiant ym Mhafiliwn Bont ar 29 Medi, 2007 gyda ffair bleser a noson o reslo ac atyniadau cerddorol gyda Caryl a'r Band a Bryn Fôn fin nos.
Hanes y ffair
Roedd y ffair, a enwid yn Ffair Gŵyl y Grog, yn un o bedair a gynhelid gan fynachod Mynachlog Ystrad Fflur mor bell yn ôl â'r ddeuddegfed ganrif. Fe'i cynhaliwyd i gychwyn ar lan afon Fflur, lle safai'r fynachlog cyn iddi gael ei symud i'w safle presennol ar lan afon Teifi. Dyna pryd y symudwyd y ffair i fyny i Ffair Rhos ac yn ddiweddarach i lawr gwlad ym Mhontrhydfendigaid. Yn y ffeiriau hyn y byddai'r mynachod yn gwerthu eu cynnyrch, sef da byw a gwlân.
Erbyn diwedd y bedwaredd ganrif ar bymtheg dim ond ffair Gŵyl y Grog o'r pedair ffair flynyddol oedd yn aros. Fe'i cynhelid ar 25 Medi. Newidiodd yn raddol o fod yn ffair anifeiliaid i fod yn ffair bleser. Daeth y ffair i ben yn llwyr ar ddechrau'r 1960au.
Adfer y ffair
Syniad dau o bobl leol oedd adfer y ffair. Mae Non Jones yn ffermwr lleol a Henry Bulman yn adeiladydd o ardal Tregaron. Trefnwyd y digwyddiad mewn cydweithrediad â Digwyddiadau MP, cwmni cysylltiadau cyhoeddus o Gaernarfon.
Cyn y diwgyddiad, roedd Non Jones yn ffyddiog y byddai'r ffair yn llwyddiannus ar ei newydd wedd. "Eisoes mae Rasys Trotian Tregaron, a gynhelir filltir o'r Bont, wedi troi'r ardal hon yn ganolfan geffylau sy'n enwog drwy Ewrop a Gogledd America," meddai. "Mae hyn yn ddatblygiad naturiol felly. Mae ffeiriau gwerthu fel hyn wedi profi i fod yn boblogaidd iawn yng Ngogledd America a gobeithiwn y bydd hwn yn ddigwyddiad blynyddol."
Disgwyliwyd pob math o geffylau, o rai gwedd i'r ceffylau Shetland, o ferlod mynydd i geffylau trotian ac, wrth gwrs, cobiau Cymreig. Yn wir, derbynnir unrhyw fath o geffyl, dim ond ei fod yn geffyl arwain. Roedd cyfleusterau i stablo'r ceffylau dros nos mewn stablau symudol a chost cofnodi yn cynnwys cost stablo. Cynhaliwyd yr arwerthiant ei hun o fewn i'r Pafiliwn, gydag arwerthwr lleol, D A G Jones o Dregaron.
Adolygiad o gig Bryn Fôn ym Mhafiliwn Bont yr un noson
 |
Ìý
