 |
|
Pigo
ar Tebot Express
Arbrawf sgwennu nofel ar y cyd
Mehefin 2003
|
Y Tebot Express'. Nofel Ni BT. Gwasg Carreg Gwalch. £3.99
Adolygiad gan Meirion P. Rees
Dyma lyfr unigryw, llyfr sydd wedi ei greu gan ddisgyblion o rhyw
17 o ysgolion Cymru.
Rhan o ymgyrch BT i hyrwyddo eu gwasanaethau Cymraeg oedd yr arbrawf
gyda rhyw ddau neu dri o ddisgyblion o bob un o'r ysgolion yn cael
cyfle i gyfrannu i'r nofel.
Mae'n rhaid dweud imi gael tipyn o sioc wrth ei darllen.
Siomi o'r ochr ora
Oherwydd y ffordd y crewyd y nofel, nid oeddwn yn disgwyl llawer pan
eisteddais i lawr i'w ddarllen ond cefais fy siomi o'rr ochr orau
gan fod y stori wedi ei hysgrifennu mewn modd slic iawn gan symud
o un digwyddiad i'r llall yn rhwydd a chynnal diddordeb y darllenwr.
Mae'r iaith yn gyfoes ac er bod llawer o ddefnydd o fratiaith mae
hyn yn ychwanegu at yr apêl ac yn ei wneud yn llyfr hawdd i'w ddarllen.
Dilyn helyntion gweithwyr y Tebot Express, caffi byrgrs Americanaidd
newydd yn Aberystwyth, mae'r llyfr.
Mae yna bob math o gymeriadau yn y nofel, rhai gwahanol a difyr iawn.
Er engraifft Gwen, nain sydd yn hoffi mwynhau ei hun o dro i dro a
chyn berchrenwraig y Tebot Aur cyn enw y caffi cyn i Brad ei
brynu.
Er enghraifft, reit fuan yn y llyfr mae yna noson Garioci yn y Tebot
Express a dyma'r disgrifiad a gawn o Gwen,
"Daeth Gwen drwodd o'r cefn yn gwisgo ffrog goch llawer rhy dynn iddi,
ei hwyneb yn blastar o golur tywyll a gliter, a wig tywyll fel brws
ar ei phen."
Tipyn o gymeriad mae'n amlwg.
Prif gymeriad
Er bod y crynodeb ar gefn y llyfr yn awgrymu mai Brad yw'r prif gymeriad
anaml iawn mae'r nofel yn cyfeirio ato. Ar y dechrau a'r diwedd yn
bennaf, heblaw pan fo'n gweiddi ar ei staff a bygwth eu diswyddo.
Mae yna ambell i ddigwyddiad digri yn y nofel. Er enghraifft yn ystod
y noson Garioci, mae Gwen a Wil wedi cael gormod i yfed a Gwen yn
camddeall Wil.
"Ti eisie bach o Chardonnay, Gweni annwyl?' gofynnodd Wil ac mae Gwen
yn camddeall gan feddwl mai wedi gweld merch o'r enw Chardonnay o'r
gyfres Footballers Wives mae Wil, 'BLE?....Ond fe ddwedest
ti dy fod ti wedi gweld Chardonnay sy yn Footballers Wives,
Wili bach."
Doeddwn i ddim yn rowlio chwerthin drwy'r llyfr er bod yna botensial
iddo fod yn ddoniol iawn oherwydd y sefyllfaoedd hectig yn y caffi.
Plot yn siomedig
I ddweud y gwir siomedig oedd y plot.
Arwydd stori dda i mi yw bod cliwiau i'w darganfod fesul dipyn fel
bod y darllenwr yn llawn chwilfrydedd am y darganfyddiad mawr ar y
diwedd.
Yn anffodus does dim felly yn y llyfr hwn. Cyfres o ddigwyddiadau
sydd yma ac nid plot sy'n adeiladu trwy'r llyfr.
Mae'r darganfyddiad mawr sydd tua diwedd y llyfr yn siom am nad oes
yna baratoi ar ei gyfer yn y stori.
Prif syniad stori y nofel yw fod y Tebot Express yn goroesi
yr holl helyntion sy'n digwydd yno ond mae yna rai pethau yn y stori
nad ydyn nhw'n gwneud synnwyr o gwbwl nac yn cyfrannu at y stori.
Er enghraifft mae Max yn cael ei ddiswyddo am fod yn ddiog ond nid
yw Saran yn cael ei diswyddo am ddod a tharantiwla a llygod mawr i'r
bar byrgrs.
Be nesaf?
Ond nid yw'r plot gwan ac ambell i ddigwyddid allan-o'i-le, yn amharu'n
ormodol a'r hyn sy'n gwneud y llyfr yma yn un da yw nad oes gan y
darllenwr syniad beth sy'n mynd i ddigwydd nesaf.
Weithiau mae'n amlwg braidd mai plant ac nid oedolion sydd wedi sgrifennu'r
stori ac i fwy nag un person fod yn sgrifennu.
Nid yw pob digwyddiad yn ffitio i mewn efo gweddill y llyfr. Er enghraifft
pan fo'r criw yn mynd i weld cyngerdd Stereophonics, does dim yn digwydd
yno sy'n cyfrannu at y stori heblaw fod Tomos yn gwneud ffwl ohono'i
hun.
Mae yna bethau eraill hefyd sy'n awgrymu mai tîm ac nid un person
fu'n sgrifennu.
Tafodiaith yn newid
Mae'r holl nofel wedi ei hysgrifennu yn nhafodiaith y de ond mewn
rhai llefydd mae'r dafodiaeth honno yn dew ofnadwy ond mewn llefydd
eraill yn weddol denau.
Nid yw'r iaith yn gyson. Hefyd mae'n rhaid fod gwahanol aelodau o'r
tîm hefo syniadau gwahanol am nodweddion y cymeriadau.
Er enghraifft, mewn un lle mae Saran yn ferch swil sy'n cadw i'w hun
ond mewn pennod arall yn fuan wedyn mae hi'n ymddwyn fel pe byddai
wedi bod yn ffrindiau â Blod ers yn ferch fach ac yn y gig Stereophonics
mae hi'n dipyn o slwt.
Mae'r llyfr yma werth £3.99 ac mi wnes i fwynhau ei ddarllen. Mae'r
stori yn symud yn sydyn ac yn slic iawn. Edrych ymlaen at y nesaf!
Oed - 12 - 18
|
|
|
Gair
am air
Siart
Cymru
Llyfrau
ar y We
Nôl
i'r archif
