 |
|
Ail
wynt
i Nova
Arloesydd
a fu farw
yn cychwyn eto
Dydd Iau, Mai 25, 2000
|
Cylchgrawn
yr wythnos: sylwadau Glyn Evans
Mae o'n un o'r cloriau mwyaf trawiadol a chofiadwy yn hanes cloriau
cylchgronau.
Croten fach ddu yn sefyll yn ddel uwchben y geiriau: "Efallai
eich bod chi'n meddwl fy mod i'n edrych yn annwyl ond a fyddech chi'n
byw y drws nesaf i Mami a Dadi?"
Un o nifer o gloriau yn adlewyrchu natur flaengar y cylchgrawn Nova
a gyhoeddwyd gyntaf yn 1965 ac a agorodd gwys go arbennig ym maes
cylchgronau merched rhwng hynny a'i ddiwedd yn 1975.
Sathru cyrn hysbysebwyr
Nova ddechreuodd wneud y pethau nad oedd cylchgronau merched yn
eu gwneud cyn hynny. Un o ganlyniadau hynny oedd sathru cyrn hysbysebwyr.
Ddechrau'r saithdegau, cyn iddi fod mor ffasiynol ag yw hi heddiw
i wrthwynebu gwisgo dillad ffwr, defnyddiodd Nova drampod a
chardotion i fodelu cotiau ffwr. Disgrifwyd y cotiau fel "y
pethau olaf ydych eu hangen."
Collodd filoedd o bunnau wrth i gwmniau dillad ffwr wrthod hysbysebu
ynddo.
Dangos y ffordd i eraill
Er i Nova ei hun farw yr oedd wedi gwneud digon i ddangos y
ffordd i gylchgronau merched eraill a aeth yn fwy-fwy rhyfygus gyda
threigl y blynyddoedd.
Erbyn hyn mae pob un yn llawn rhyfyg.
Y mis hwn, mae'r cylchgrawn a gyhoeddodd erthygl fentrus (yn y chwedegau)
"Sut i ddadwisgo gerbron y gwr" ac a gyhoeddodd luniau modelau
yn eistedd ar y ty bach, yn awr am roi cynnig arall arni.
Digwydd hynny mewn dyddiau pan yw cylchgronau merched 'blaengar' wedi
eu britho ag erthyglau orgasmig ynglyn a charu efo dynion dieithr,
caru efo merched eraill, cynhyrfu'ch gilydd yn rhywiol ac yn y blaen.
Agor ei fater ei hun
Yr addewid yw y bydd Nova newydd cwmni IPC yn agor ei fater
ei hun yn hytrach na cheisio cystadlu'n uniongyrchol a'r rhyfyg hwn.
Bydd yn ceisio bod yn flaengar ac yn sylweddol ar yr un pryd.
Mae'r rhifyn newydd cyntaf gyda llun o Ann Claudia yn syllu'n syn
arnoch oddi ar y clawr yn cael ei ddisgrifio fel Collector's Edition.
Faint fydd ei werth mewn ugain mlynedd, nid oes wybod. Mewn ocsiwn
yn 1997 talodd Jarvis Cocker o Pulp £2,1000 am gasgliad cyflawn
o'r 125 o gopiau a gyhoeddwyd rhwng '65 a ''75 er mai ond £300-£600
oedd y pris gofyn.
Defnydd trawiadol o luniau
Tebyg bod digon o amser wedi treiglo ers yr angladd yn '75 fel na
fydd yn rhaid i'r cyhoeddwyr newydd fod yn rhy ymwybodol o draddodiad
hynod y cylchgrawn.
Does yna ddim yn y rhifyn cyntaf sy'n mynd i ddychryn na chyffroi
neb sy'n darllen y cylchgronau hyn ond y mae yna arwyddion y bydd
yna ddefnydd trawiadol o luniau - fel y llun o gig noeth penglog wedi
ei flingo i fynd efo erthygl am ddillad ffwr unwaith eto!
"Fur is sexy, we all fantasise about having some kind of sex
with animals," meddai un pennawd.
Ffasiwn mwy rhyfeddol fyth yw'r un ymhlith merched i greu lluniau
trawiadol ar flew eu harffed.
"In the USA, crotch couture doesn't raise an eyebrow,"
meddai rhyw ddynes o Miami wrth drafod y "pubic topiary"
hwn sy'n galluogi merched i gael baneri eu gwlad, mefusen neu logo
Merc yn yn eu mannau dirgel.
Dywedodd y golygydd cyn cyhoeddi na fyddai'n mynd ar ôl deiets
carlam a phrydferthwch smâl. Yn y rhifyn hwn yr hyn mae'n ei
wneud yw tynnu'r gorau o brydau merched cyffredin o Ffrainc, Siapan,
yr Unol Daleithiau a Phrydain - y pedair ohonyn nhw yn cael eu darlunio'n
noeth.
Blair yn ddyn lloerig!
Bu'r cylchgrawn hefyd yn holi cant o ferched 'blaengar' - Juli Burchils
a Mo Mowlams y byd yma - am bynciau cyfoes fel hhiliaeth, cyffuriau
a phriodoldeb cyplau hoyw yn magu plant.
Y canlyniad? Dywedodd 83 ohonyn nhw nad yw merched sy'n gweithio yn
cael chwarae teg.
Dim ond 47 sy'n "dal i gredu yn Tony Blair" a dywedodd Rebecca
Ray amdano, "Dyn Lloerig wedi dod i ddinistrio Prydain ydi
Tony Blair. Mae wedi mynd yn wallgof. Pe byddwn yn ei gyfarfod yn
y stryd byddai gennyf ei ofn"
Ychydig iawn, iawn, sydd o'r farn na ddylai cyplau hoywon gael magu
plant ond y mae amhendantrwydd ynglyn â'r cwestiwn, A yw
dynion angen merched fwy nag yw merched angen dynion?
Merched yn fwy particlar
Beth bynnag yr angen y mae erthygl arall yn cyhoeddi fod yna "dystiolaeth
wyddonol" fod merched yn fwy gofalus na dynion efo pwy maen
nhw'n cysgu.
Dim ond chwech o ferched allan o bob cant a ddywedodd ie
wrth ddyn dieithr yn eu gwahodd i'w gartref y noson honno tra bo 69
y cant o ddynion wedi derbyn yr un gwahoddiad oddi wrth ferch.
Ni chytunodd yr un ferch i garu â dyn yr oeddynt newydd ei gyfarfod
ond yr oedd 75 y cant o ddynion yn fodlon manteisio ar yr un cynnig
gan ferch ddieithr.
Rhyfedd o fyd.
Nova. The Second Coming. mehefin 2000. £1.50
"
|
|
|
Steddfod
2003 
