 |
|
LLeisiau
duon
Cylchgrawn
yr wythnos y tro hwn yw Black Media Journal
Dydd Iau, Ebrill 20, 2000
|
Pwyso
a mesur sut mae’r cyfryngau ym Mhrydain yn trin pobol dduon y mae
BMJ - Black Media Journal.
Ymateb sgrifenwyr o dras Affricanaidd, Caribeaidd ac Asiaidd sydd
yn yr hyn sy’n cael ei alw yn llais swyddogol y Black Media Institute
- corff na wyddwn i am ei fodolaeth.
Mae’n llwyfan i bawb sydd a rhywbeth i’w ddweud am agwedd y cyfryngau
tuag at bobol dduon.
A ninnau, Gymry, yn lleiafrif ieithyddol y mae gennym ddiddordeb naturiol
mewn gwybod mwy am helyntion lleiafrioedd eraill.
Pwy ydan ni
Dydi o ddim yn synnu rhywun fod hunaniaeth a 'phwy ydan ni'
yn bwnc trafod; gyda Darcus Howe, yn dilyn taith o amgylch Prydain
ar gyfer rhaglen deledu, yn datgan yn groyw, "If there is one thing
I know - this is my country. I am an Englander."
Darganfu ef hefyd fod yr "Hen Loegr" hunanhyderus wedi diflannu.
"Mae pobol mewn creisus, mae rhywbeth wedi gorffen a does yna ddim
i’w roi yn ei le," meddai.
Ymhyfrydu mewn bod yn wahanol
Mae ystyriaethau arbennig i berthyn, wrth gwrs, os ydi rhywun
yn teimlo ac, yn enwedig, yn edrych yn wahanol i’r lleng a neges BMJ
i bobol dduon yw fod angen iddyn nhw ymhyfrydu yn yr hyn ay’n eu gwneud
yn wahanol.
Rhybuddir na thâl hi ddim, i smalio bod pawb yr un fath a dywedir
bod angen arbennig am sgrifenwyr duon sy’n deall holl rychwant y bywyd
du yn ei holl amrywiaeth.
Arwydd o eangder y rhychwant hwnnw yw yr amrywiaeth o bynciau sy’n
dod dan chwydwydr BMJ o faterion rhyngwladol i ryw gyda
thrafodaeth eang am erotica du.
Mae Janet Momo yn cymryd "a long, hard, look at the chocolate jungle
bunny, Naomi Campbell"
Er bod edrych yn hir arni hi yn rhywbeth hawdd iawn ei wneud y mae’r
defnydd a wnaeth Playboy ohoni yn codi cwestiwn ynglyn â’r
defnydd o ferched yn gyffredinol a’r defnydd o ferched duon yn arbennig
i ddibenion gogleisio rhywiol.
Mae llawer yn cael ei wneud o’r ffaith i Naomi fabwysiadu - wrth bosio’n
rhywiol mewn llun efo llewpard - ystum negresse oedd yr hen
berchenogion caethweision yn ei ffafrio pan yn treisio eu heiddo.
Mae Elaine Pennicott yn holi wedyn "why Melvin Van Peebles is so
damn sexy" wrth drafod y "black male superstud" hwnnw.
Syllu i ddyfnder yr enaid
Mae Caroline Shola Arewa am i bobl edrych yn ddwfn i’w heneidiau eu
hunain.
"Y neges yr ydym yn ei derbyn ar hyn o bryd yw nad yw pobl o liw,
gyda chyrff siocled blasus, prydferth, yn ofni rhywioldeb. Nid yw
ei rym a’i hudolaeth yn tarfu arnom. Yr ydym yn fodau rhywiol ac yn
falch o hynny ond y mae’n ymddanos ein bod yn ofnus pan yw’n dod i
ddathlu ein rhywioldeb a’i gysegredigrwydd," meddai hi.
"Y mae’n bryd inni anwesu ein prydferthwch a’n rhywioldeb a’r ysbryd
sy’n cyniwair ynddom a dangos beth ydym mewn gwirionedd a dangos ein
dwyfoldeb," meddai.
gan Glyn Evans
BMJ. Rhifyn 2. £3.50
Os ydych eisiau ymateb i'r erthygl hon, cliciwch ar y cyfeiriad gwebost:
glyn.evans@bbc.co.uk
|
|
|
Steddfod
2003 
