Bys ar fotwm...
O diar. Mae Rhodri Morgan newydd esbonio ei fod wedi gwthio'r botwm pleidleisio anghywir yn ystod ddadl yr wythnos ddiwethaf. Dadl ynghylch cynnig gan Peter Black oedd honno lle'r oedd y Democrat Rhyddfrydol am gyflwyno cais am yr hawl i ddeddfu i newid y system bleidleisio ar gyfer etholiadau lleol Cymru. Gwrthodwyd y cais hwnnw gyda'r mwyafrif llethol o aelodau Llafur yn pleidleisio yn erbyn. Roedd Rhodri yn un o ddau aelod Llafur wnaeth bleidleisio o blaid y cynnig. Nawr mae'n ymddangos ei fod wedi gwneud hynny ar ddamwain. "Mae'n rhaid derbyn y cyfrifoldeb am gamgymeriadau ac fe wnes i gamgymeriad" meddai. "Computer malfunction" oedd esboniad y Prif Weinidog- problem debyg i "wardrobe malfunction" Janet Jackson a Justin Timberlake o bosib!
Dyw hynny ddim yn ateb y cwestiwn a godwyd gan Mike German sef "pam gwrthod y cais?" Wedi'r cyfan doedd cynnig Peter Black ddim yn golygu y byddai 'na unrhyw newid yn y gyfundrefn bleidleisio. Rhoi'r hawl i'r cynulliad newid y system oedd y bwriad. Mae pwynt Mike German yn un digon teg. Os ydy Llafur o ddifri am drosglwyddo pwerau deddfwriaethol llawn i'r cynulliad pam y mae'r blaid yn gwrthwynebu cais am drosglwyddo rhan fechan o'r pwerau hynny?
Ond nid aelodau Llafur yw'r unig rhai a allai fod a safonau dwbl yn y maes yma. Rydym yn clywed byth a hefyd am yr angen am bwerau deddfu llawn. Mae 'na drafod di-ben-draw am amseriad refferendwm. Ond mae'n bosib i'r cynulliad gwneud cais am yr hawl i ddeddfu ar unrhyw bwnc ar unrhyw bryd. Sawl aelod felly sydd wedi cynnig eu henwau yn balot i benderfynu pwy fydd yn cael cyflwyno cais i ddeddfu'r mis hwn? Dim un. Edrychwch ar ;
Mesurau Balot: 11 Mehefin 2008
Ni chyflwynwyd unrhyw gynigion
Dyna ni felly. Does dim un aelod o'r cynulliad yn gallu meddwl am unrhyw bwnc lle byddai'n ddefnyddiol i gael pwerau deddfu. Cofiwch hynny y tro nesaf i un ohonyn nhw frefu am ba mor rhwystredig yw'r pwerau presennol.
Golygydd Materion Cymreig y Â鶹ԼÅÄ yn blogio'n rheolaidd ar faterion gwleidyddol Cymru.
SylwadauAnfon sylw
Diffyg cynigion am Fesurau oedd yna, nid diffyg cynigion am LCOs fel rydach chi i weld yn awgrymu. Roedd rhestr hir o gynigion ar gyfer ymestyn pwerau'r Cynulliad.
Mae'r ffaith nad oedd cynigion am Fesurau yn awgrymu nad oes digon o bwerau i allu pasio Mesurau gwerth-chweil onid ddim?
Wps! Mae Idris yn gwbwl gywir! Mea Cwlpa.
Mae Idris yn iawn yn dechnegol ar y gwhaniaeth rhwng LCOs a Mesurau, ond ar y pwynt gwleidyddol ynglyn a dim "digon o bwerau i allu pasio Mesurau gwerth-chweil" mae'n bell mas yn fy nhyb i.
Mae'r Cynulliad yn barod wedi ennill llwyth o Faterion yn Atodiad 5. Edrychwch ar y tudalen we priodol (https://www.cynulliadcymru.org/bus-home/bus-legislation/bus-legislation-guidance/bus-legislation-guidance-documents/legislation_fields/schedule-5.htm) a gwelwch llu ohonynt yn enwedig ym maes addysg a llywodraeth leol.
Ac fel lobiydd dwi'n derbyn rhan o'r bai am beidio gweithio gydag aelodau ar gyfer defnyddio'r pwerau sylweddol yma.
Roedd ein grwp wedi penderfynu ein bod wedi disbyddu y posibiliadau o bwerau presennol y Cynulliad a roeddym am gadw ein Mesurau ar gyfer GCDau yn y dyfodol.
Rhaid i chi gofio fod tri A.C. Dem Rhydd wedi ennill y balot Mesurau yn barod a does dim ond tri A.C. Dem Rhydd ar ôl gyda thair mlynedd a llawer o falotiau i fynd.