O Lanon i Dŷ Ddewi
'Gwnewch y pethau bychain'. Dyna gyfarwyddyd Dewi Sant.
Felly dyna be wnes i, mynd ar bererindod o Lanon i Dŷ Dewi, ar Fawrth 1af er mwyn dathlu gŵyl ein nawddsant.
Lloyd Jones oedd fy nhywysydd ar y daith, ac ar lan y môr yn Llanon fe fu Carol Jones yn adrodd hanes sut y cafodd Dewi ei fagu gan ei fam Non.
Hanes y mae hi'n hen gyfarwydd ag o, gan ei bod hi wedi bod yn athrawes tan yn ddiweddar yn ysgol gynradd Penuwch.
Ymlaen wedyn, o Lanon i Landdewibrefi wedyn i gyfarfod plant yr ysgol leol, yn eu gwisgoedd Cymreig, Yn Llanddewi, yn ôl yr hanes, tra 'roedd Dewi yn pregethu, fe gododd y tir o dan ei draed, er mwyn i'r dorf gael ei weld yn well.
Plant Ysgol Gynradd Llanddewibrefi ar ddydd Gŵyl Dewi
Mae'r ficer presennol Dyfrig Evans ar fin gadael yr ardal gan ei fod o wedi cael ei benodi yn ficer eglwys yng Nghaerdydd.
Enw'r eglwys? Yn addas iawn - Eglwys Dewi Sant!
Tŷ Ddewi, oedd diwedd y daith i ni, ac erbyn i ni gyrraedd 'roedd Nan George a'i ffrindiau wedi paratoi te a sgons i ni yn Siop y Bobol.
'Roedd y Canon, Dorian Davies, eisoes wedi manteisio ar groeso Nan, ac yn sefyll yng nghwmni, Dafydd Aeron, yn mwynhau sconsan a phaned.
Efallai bod enw Dafydd Aeron yn gyfarwydd i chi, os 'da chi'n un o ffans Panto Felin Fach.
'Roedd o a Geraint Lloyd yn ddau o sêr y panto - Geraint yn chwarae rhan y cipar a Dafydd Aeron fel ficer.
Ond daeth tro ar fyd, ac mae Dafydd wedi penderfynu troi o fyd y ddrama i'r eglwys, ac ym mis Awst fe fydd yn cael ei ordeinio yn ficer Tŷ Ddewi. Pob dymuniad da i Dafydd, a diolch i bobol Llanon, Llanddewi a Thŷ Ddewi am eu croeso.
I'r Gogledd y bydda i'n teithio yr wythnos nesa i Wrecsam, cartre' yr
Eisteddfod Genedlaethol eleni.
A chofiwch, mae'r fan a finna, yn barod i deithio i unrhyw fan, dim ond i chi anfon e-bost at hywel@bbc.co.uk
Hanesion 