Jyglio llyfrau
Fydd hi'n bosibl iddyn nhw gael cystadleuaeth Lyfr y Flwyddyn Cymru yn iawn - unrhyw dro, byth?
Bu cwyno yn y gorffennol pa mor anodd yw hi i feirniaid bwyso a mesur gwahanol fathau o lyfrau yn erbyn ei gilydd - barddoniaeth yn erbyn nofel ac yn y blaen.
Ac wele Llenyddiaeth Cymru - enw newydd Yr Academi sy'n rhedeg y gystadleuaeth - yn addo beirniadu fesul categori y flwyddyn nesaf.
Ochenaid o ryddhad cenedlaethol felly?
Wel na. Yn rhifyn mis Mai o sydd newydd ei gyhoeddi mae'r nofelydd a beirniad llenyddol John Rowlands yn dal i weld bwganod!
Wrth sôn am y bwriad i "rannu'r llyfrau'n gategorïau y flwyddyn nesaf, sef ffuglen, llyfrau ffeithiol a barddoniaeth" dywed:
"Ond rhyfedd yw meddwl y gall hynny hefyd greu annhegwch.
"Ystyrier," medda fo, "mai dim ond un gyfrol o gerddi sydd ar y Rhestr Hir eleni, sef eiddo Gwyn Thomas. Petai yna gystadleuaeth ar gyfer y beirdd yn unig, byddai llyfr Gwyn Thomas yn cael buddugoliaeth rwydd, heb lawer o gystadleuaeth.
"Ond y mae pedair nofel ar y Rhestr Hir, ynghyd â chyfrol o straeon byrion, sy'n awgrymu bod ffuglen Gymraeg yn rhagori ar farddoniaeth ar hyn o bryd.
"Wrth gwrs, fe all pethau newid yn ddisymwth. Ac a fydd raid dewis beirniaid gwahanol ar gyfer y gwahanol gategorïau?
"Diddorol fydd gweld sut bydd y gystadleuaeth yn esblygu," medda go.
Wel ia. Mi allai ddychmygu ymhen deng mlynedd y bydd beirniad ar gyfer pob llyfr - a neb yn colli.
Siawns na fyddai pawb yn hapus wedyn.
