Argyfwng gwyddonol
Dim rhyfedd i John Hartson sgorio cymaint o gôls yn ystod ei yrfa ddisglair. Mi fum i'n ceisio'i ddal o ar y Maes ddechrau'r wythnos a methu'n glir a dal i fyny efo fo.
Yr oedd o'i fod yma i agor y Babell Wyddoniaeth ac i drosglwyddo ei sgiliau pêl-droed i robotiaid o Brifysgol Casnewydd.
Ond trwy gael ei ddal yn ôl mewn traffig yr oedd yn hwyr yn cyrraedd y Maes ac mi fum i ac eraill yn disdgwyl a loetran a cherdded nol a blaen am amser cyn dod ddigon agos i'w daclo.
Ond fe wnes i'n well na threfnwyr y Babell Wyddoniaeth.
Pan oedd yn ymbaratoi i gyflawni ei ddyletswyddau yno pwy ddaeth yn dân ac yn frwmstan i gyd ond "rhywun o S4C" a'i gipio fo oddi yno i wneud rhywbeth llawer pwysicach ym mhabell y Sianel.
Yn digwydd bod yn y Babell Wyddoniaeth yr un pryd, i holi John, yr oedd Huw Llywelyn Davies ac yn eu hargyfwng gofynnodd y gwyddonwyr iddo ef a fyddai'n fodlon agor eu harddangosfa yn swyddogol.
Cytunodd wrth gwrs - er cyfaddefodd Huw wedyn y byddai wedi bod bron yn amhosib iddyn nhw ddod o hyd i rywun llai gwyddonol ei gymwysterau.
Ond o leiaf fe gafodd y babell ei hagor - ac ar ben hynny fe gadwodd S4C eu dyn. Ac mae hynny'n rhinwedd, siwr o fod, y dyddiau dyrys hyn i'r Sianel!
