Hawdd dweud
Sgrifennu llythyrau, camp Caerdydd, cyfrinachau'r stafell wely - rhai o'r pynciau gododd eu pennau yn ystod yr wythnos wythnos yn y wasg ac ar y cyfryngau.
Dyma'r dyfyniadau:
- Does yna ddim pwynt mynd ar yr awyren os nad ydych yn mynd i lawr yno gyda'r bwriad o berfformio'n dda ac o ennill - neges Warren Gatland i'r chwaraewyr rygbi a ddewisodd i ymweld â Seland Newydd.
- Mi rydw i'n eistedd yn disgwyl yn Aberystwyth, ac mae hi'n anodd iawn - Kerianne Phillips, 22, o Aberystwyth, sy'n ymddangos mewn hysbyseb yn galw am newid y gyfraith ynglŷn â rhoi organau. Mae hi angen iau newydd.
- Mae rhywbeth fel hyn yn mynd y tu draw i bêl-droed - Garry Monk, Capten tîm pêl-droed Abertawe yn dilyn marwolaeth Besian Idrizaj a fu farw'n 22 oed.
- Mae BARB yn amcanu fod yna 58,000 o gartrefi yng Nghymru lle mae pawb yn gallu siarad Cymraeg ond sydd yn defnyddio Saesneg yn brif iaith y cartref - Iona Jones, Prif Weithredwr S4C.
- Bydd un o bob pump o weithwyr Cymru yn dweud wrth eu bos eu bod yn sâl yr haf hwn er mwyn iddynt gael aros adref i wylio gemau Cwpan y Byd - stori newyddion yn 'Y Cymro'.
- Mi faswn i'n gallu bod yn y dyddiau du hynny o hyd, yn teimlo'n sori drosta fi'n hun, ond erbyn heddiw dwi'n rhy brysur - Brian Roberts o Flaenau Ffestiniog yn rhifyn Mai o 'WA-w!'. Ni all gerdded yn dilyn damwain motobeic yn 1996 ond mae'n gobeithio cystadlu yn gemau paralympaidd 2012.
- Mae'n hawdd gweld pam y mae plant yn colli'r arferiad o sgrifennu llythyrau ond y mae yna rhyw swyn yn perthyn i lythyr yn cyrraedd drwy'r post ymhlith yr amlenni brown arferol a'r cylchlythyrau - Roy Noble yn gofidio bod y genhedlaeth iau yn barotach i dectsio ac ebostio nag i sgrifennu llythyr.
- Er fy mod yn mynd am y teitlau Saesneg mae fy acen Gymraeg gen i o hyd ac rwy'n falch o fod yn Gymraes - Liza Laszarus, cyn Miss Wales, yn dweud y bydd yn cystadlu i fod yn Miss England.
- Lawer o'r amser fe wnawn ni dreulio deugain munud yn siarad a dim ond rhyw ugain munud yn cael rhyw - 'Escort' o Gymru yn rhannu rhai o gyfrinachau yr ystafell wely a chwsmeriaid yn eu deugeiniau a'u trigeiniau gyda'r 'Wales on Sunday'..
- Os gwnawn ni gyflawni yr hyn ydym ni eisiau nid mynd a chlwb pêl-droed i fyny fyddwn ni; byddwn yn mynd a'r genedl i fyny - Dave Jones, rheolwr clwb pêl-droed Caerdydd.
