Mewn powlen o eira . . .
Ddoe yr oedd y diweddar Ioan Bowen Rees ymhlith y rhai hynny yr oedd dydd ei eni yn cael ei nodi ar raglen gynta'r dydd ar Radio Cymru.
Fe'i disgrifiwyd yn syml fel awdur a bardd ond yr oedd yr arbenigwr ar lywodraeth leol a anwyd yn Nolgellau Ionawr 13 1929 yn dad i Gruffudd Rhys prif leisydd y Super Furry Animals ac yn fynyddwr o fri hefyd.
Bylchau - Ysgrifau Mynydd a Thaith oedd teitl un o'i lyfrau ac yn dal mewn print a chyhoeddwyd argraffiad cain o lyfr Saesneg o'i eiddo am fynyddoedd Cymru gan Wasg Gregynog.
Dim ond ychydig ddyddiau cyn ei farwolaeth Mai 4 1999 dringodd i gopa Moel Wnion.
Y mynydda a ddaeth ag ef i gof yr adeg arbennig hon pan yw'r wlad yn drwch o eira a llethrau a chopaon ein mynyddoedd mor hardd.
Flynyddoedd yn ôl pan oeddwn yn casglu hoff resipis gwahanol enwogion ar gyfer llyfryn a gyhoeddwyd i godi arian i gymdeithas MENCAP Caernarfon y 'ffefryn' a anfonodd Ioan Bowen Rees i'w gynnwys oedd:
Dewis diwrnod heulog yn y gaeaf.
Prynu tun o fafon cochion.
Dringo i ben mynydd (gan gofio rhoi llwy ac agorwr tun yn eich sach ddringo).
Gwneud pant yn yr eira.
Tywallt y mafon i'r pant.
Cymysgu tipyn ar yr eira a'r mafon a'u bwyta.
Mefus moes mwy fel y gallai rhywun ddweud.
