I'r diawl a'r gasgen gwrw
Y gorau y gellid ei ddweud am fuddugoliaeth yr Urdd yn y frwydr i gael gwerthu gwinoedd a chwrw ar faes Eisteddfod Genedlaethol y mudiad yn Llannerchaeron yw mai buddugoliaeth dechnegol yw hi.
Fel y clywyd ar Taro'r Post ddoe, i gyfyngiadau y ddeddf drwyddedu y mae'r Urdd yn ddyledus.
Erbyn hyn nid yw yma nac acw ai peth da ynteu peth drwg yw cael trwydded i werthu diodydd meddwol ar y maes - pris y fuddugoliaeth sydd bwysicaf bellach.
Hynny yw, faint bynnag o arian ychwanegol a ddaw yn sgil y gwinoedd a'r cwrw - ond nid gwirodydd - y sym nesaf i'r Urdd i'w gwneud yw a fydd hynny werth cost yr holl anniddigrwydd a achoswyd gan y bwriad ac a yw'r faint bynnag o ewyllys da a gollir yn mynd i fod werth y pris.
Amser a ddengys, ond mae peryg mai'r gwrthwynebwyr fydd piau'r fuddugoliaeth foesol gan adael yr Urdd gydag ond yr ysbeilion technegol a chryn dipyn o waith patsio.
Rhywbeth y gellid ei wneud yn ystod wythnos yr Eisteddfod o bosibl - dros bryd a glasied o win.
Ac wedi gwydraid neu ddau efallai y byddai werth i'r Urdd holi pam goblyn y tynnodd y fath helynt i'w ben a fawr dim galw o gwbl wedi bod am y ddarpariaeth hyd y gall rhywun gasglu.
A beth am yr holl wrthwynebwyr?
Fyddan nhw yn ddigon cadarn i fod yn llwyr ymwrthodwyr eisteddfodol yn yr ystod yr wythnos?
Wedi'r cyfan honno fyddai'r brotest eithaf - y brotest fyddai'n brifo.
Yr holl win a chwrw - ond dim gwirodydd - yna ar y maes a neb yn eu prynu.
Gall Eisteddfod Genedlaethol yr Urdd 2010 fod yn un hynod ddifyr - am y rhesymau anghywir.
Ewch i'r iPkayer i wrnado ar Taro'r Post, ddoe.
SylwadauAnfon sylw
Newydd ddarllen dy flog Glyn, miosoedd yn hwyr - "Gall Eisteddfod Genedlaethol yr Urdd 2010 fod yn un hynod ddifyr - am y rhesymau anghywir."
Gobethio y bydd y Brits Broadcasting Company yno wrth gwrs - nawr dyna fydde stori i ni'r Cymry.
Dim sylw mawr heblaw am dynnu sylw at flog Pethe yr wythnos yma a llun o win newydd Cymreig sydd arno. Gwin da o Gymru o'r diwedd. Gwyn coch, gwyn - a gwyrdd!