Hen luniau'n dwyn atgofion
Mae Rhaglen y Dydd Y Bala yn dangos traul yn barod wrth i rywun chwilio a chwalu am bethau i'w gwneud yn ystod yr wythnos.
Yr arwyddion hyd yn hyn yw y bydd eithaf cefnogaeth i weithgareddau dan do - y Babell Lên, Theatr Fach y Maes, Y Lle Celf ac yn y blaen - gan ei bod yn ymddangos ar y funud na fydd y tywydd yn ffafrio crwydro'r maes.
Yn wir, ella y cawn ni bafiliwn llawn - rhywbeth na ddigwyddodd yn ystod y blynyddoedd diwethaf hyd yn oed ar gyfer y prif seremonïau.
Ychwanegiad hynod ddifyr i Raglen y Dydd ers rhai blynyddoedd bellach yw'r detholiad o hen luniau sy'n cael eu cynnwys - a dydi Rhaglen Eisteddfod Meirion a'r Cyffiniau ddim yn eithriad. Mae yma sawl llun difyr.
Y diweddar Tom Jones Llanuwchllyn, ifanc iawn yr olwg, yn Ysgrifennydd Cyffredinol Eisteddfod 1949 ym Meirionnydd er enghraifft a'r Archdderwydd Wil Ifan yn cadeirio Rolant o Fôn yn yr un Eisteddfod.
O'r Bala, mae llun coroni Eluned Phillips yn 1967 gyda Cynan, cofiadur yr Orsedd ar y llwyfan a Dilwyn Miles urddasol, fwstasiog, yn geidwad y cledd.
Ond faint ohonyn nhw yn y llun ydych chi'n eu hadnabod - yr Archdderwydd er enghraifft, pwy oedd o yn '67?
